Ady amin'ny herisetra : Polisy vavy 17 isa no nomena fiofanana manokana, tany Ihosy
Mpiantsehatra manan-danja ao anatin'ny ady amin'ny herisetra ireo mpitandro ny filaminana, izay mandray an-tanana ny fitorohana ny trangana herisetra. Tafapetraka tamin'ny fomba ôfisialy ny Brigade Féminine de Proximité ao amin'ny Faritra Ihorombe, izay sampandraharahan'ny Polisim-pirenena miompana amin'izay ady amin'ny herisetra izay.
Fandraisana an-tanana ireo niharan'ny herisetra
Sampandraharaha iray natsangana eo anivon’ny Polisim-pirenena tamin'ny taona 2017 ny Brigade Féminine de Proximité (BFP), izay polisy vehivavy avokoa no miasa ao anatiny. Andraikitra ankinina aminy ny fandraisana an-tanana ireo olona niharan'ny herisetra mifototra amin'ny mahalahy na mahavavy (VBG). Araka izany, mpisehatra tsy azo tsinontsinoavina ny BPF, amin'ny fisorohana ny herisetra eny anivon'ny fiarahamonina. Mba hahatrarana izany tanjona izany dia miara-miasa akaiky amin'ireo mpisehatra isan-tsokajiny momba ny ady amin'ny herisetra, toy ny mpitsabo, ny fikambanana isan-tsokajiny, ireo mpitondra eny ifotony... ireo Polisin'ny BPF.
Polisy vehivavy miisa 17 no mandrafitra ny « Brigade Feminine de Proximité » ao amin’ny Fitaleavam-paritry ny Filaminam-bahoaka ao Ihorombe. Omaly 3 aprily 2025 dia nanomboka ny fiofanana izy ireo, tany Ihosy, mba ho fanamafisam-pahaizana momba ny fomba fandraisana manokana ireo olona niharan’ny herisetra, fa ihany koa mahakasika ny fanentanana sy fanabezana hisorohana izany herisetra izany. Fahaizana tokony ananan'ireo polisin'ny BFP mantsy ny momba ny zon'olombelona, ny toetra sy fihetsika tokony ananana manoloana ny trangana herisetra mifototra amin'ny mahalahy na mahavavy, ny momba ireo asa tokony hotanterahina manoloana ny herisetra sy ireo fisorohana tokony atao, ny teknika fiseraserana tokony ampiharina ao anatin'ny hodidin'izay herisetra izay…
Ady amin'ny herisetra : fijerena ny maha-olona
Tafiditra ao anatin'ny fanatanterahana ny politikam-panjakana momba ny fijerena ny maha-olona, ny ady amin’ny herisetra mifototra amin’ny maha lahy na mahavavy sy ny fampanjariana ny miralenta, no sady laharam-pahamehan’ny Polisim-pirenena ihany koa, amin'ny fanakaikezana hatrany ny vahoaka, hoy ny fampitam-baovao. Nanokatra ny fiofanana ho an'ireo polisin'ny BFP ao Ihorombe sy nitarika izany ny Sekretera Jeneralin’ny Minisiteran’ny Filaminam-bahoaka, ny Contrôleur General de Police Randriambelo Mandimbin’Ny Aina, notronon'ireo olom-boafidy sy olom-boatendry ao amin'ny Faritra Ihorombe.
