Fanotofana tany tsy ara-dalana : Rava ny tambazotra ahitana polisy kaominaly sy monisipaly

Handraisana andraikitra avokoa izay tratra

Tsy hanavahana olona ny fandraisana andraikitra sy ny fanasaziana ireo izay tratra amin’ity asa ratsy ity. Ny alin’ny 8 Febroary hifoha 9 Febroary no nahatrarana azy ireo. Niroso ny famotorana, ary efa eo am-pelatanan’ny tomponandraikitra tandrify izany ny raharaha ankehitriny. Raha tsiahivina dia tambazotra lehibe ahitana Polisy kaominaly sy Nasionaly, ary mpiasa tao amin’ny APIPA teo aloha, no tra-tehaka tamin’ity raharaha fanotofana tany tsy ara-dalàna teny Ankasina, ao amin’ny Boriborintany Voalohany, Antananarivo Renivohitra, ity. Tsy maintsy mihatra ny sazy amin’ireo olona rehetra na tompon’andraikitra aza izy.
Tetsy ankilany dia kamiao maromaro, izay tratra nanao fandikan-dalàna, no naiditra ambalam-pamonjana (fourrière). Raha tsiahivina dia efa niisa 11 teo ho eo izany ho an’ny volana novambra 2024 lasa teo. Raha araka ny lalàna moa dia tsy maintsy mandoa lamandy hatramin’ny 5 tapitrisa ireo tompon’ny tany, arakaraka ny velaran’ny tany, rehefa tratra manao izany fanotofana tany tsy ara-dalàna izany.

Fanetsehana fitaovana samihafa

Ny volana novambra 2024 teo ihany koa dia nilaza ny minisitera fa hanangana « brigade spécialisée » ho famongorana ity fahazaran-dratsy ity. Ahitana mpikambana avy amin’ny zandary, polisy, prefektora ary ny Ministera izy io. Amin’ny ankapobeny dia hiasa ho amin’ny fanaraha-maso hentitra ity asa ratsy ity izy ireo. Ao anatin’izany dia efa nanetsika fitaovana samihafa ihany koa ny Minisitera mba hanamafisana izany asa izany, toy ny « drone ». Marihina mantsy fa misy fiantraikany mivantana amin’ny fiainana andavanandron’ny vahoaka ny fanotofana tany tsy ara-dalàna. Ao anatin’izany ny tondra-drano rehefa fotoam-pahavaratra, ny faharatsian’ny voka-bary satria manakana ny rano tsy ho tody any amin’ny tanimbary ny fahatsetseman’ny lakan-drano ary ny halatra sy ny fanimbana fananana iombonana.