Kolontsaina : Seho tokana no hotanterahin'i Black Nadia eto Antananarivo amin'ny alatsinainin’ny Paska

Hanomezana fahafaham-po ny mpankafy

Tsiahivina fa taona maromaro izay no miezaka manenjika toerana maro samihafa i Black Nadia sy ny ekipany rehefa alatsinainin’ny paska satria toerana maro ihany koa no mikarakara lanonana. Amin’ity taona ity dia eo amin’ny kianjan’ny ENS Ampefiloha irery ihany no ahitana azy ireo. « Isan-taona izahay manenjika toerana samihafa ka hitanay fa tsy dia afa-po tanteraka ireo mpankafy isaky ny toerana halehanay. Amin’ity taona izahay hanatanteraka seho tokana mba hanomezana azy ireo izany fahafaham-po izany ary hamoriana azy ireo amin’ny toerana iray ihany koa », hoy hatrany ity mpanakanto ity, nanazava, nandritra ny fihaonany tamin’ny mpanao gazety tao amin’ny Campus Yas Andraharo.
Afaka hankafy ny hira rehetra nahafantarana azy ireo araka izany ny mpankafy. Afaka hianoka ny hira maro samihafa rehetra ireo mpankafy. Hanakoako ny ankamaroan’ireo hira nanamarika ny tenany sy ireo hira vaovao.

Hisy mpanakanto hafa

Toy ny mahazatra, rehefa fetin’ny paska toy izao anefa dia hisy mpanakanto samihafa ihany amin’io fotoana io. « Bomba Be » no anaran’ity fampisehoana ity ary hanamasaka ny fotoana ankoatra an’i Black Nadia i Malm Martiora, Arrich, Rao Lossa ary i Vladine.
Fotoana iray hahafahana miala voly ny alatsinainin’ny paska. Isan-karazany ny hetsika rehefa fotoana toy izao. Ny tsirairay no misafidy izay hitany fa mahafinaritra sy mahasoa azy.