TRAIL IBITY 2025 : Hazakazaka ho fanohanana ny ady amin'ny tsy fahampian-tsakafo
Ny 6 Aprily ho avy izao no ho tanterahina ny andiany faha-9 ny “Trail d’Ibity”. Hetsika ara-panatanjahantena izay mikendry ny hampifandray ny fanatanjahantena, fizahantany ary ny asa soa izy io.
Ho tontosaina ny 6 Aprily ho avy izao ny andiany faha-9 ny "Trail d’Ibity", any amin’ny faritra Vakinankaratra. Toy ny tamin’ny taon-dasa, teboka telo no hiompanany, dia ny lafiny ara-panatanjahantena, ny fizahantany ary ny asa soa.
Fanatanjahantena sy fizahantany
Isan'ireo toerana manana ny lazany raha ny tendron'Ibity na ny "Massif d'Ibity", ka izany no antony nisafidianana ity toerana ity raha ny fanazavan’ireo mpikarakara. Na mideza aza ny lalana dia mahafinaritra ny natiora manodidina rehefa tonga eny an-tampony. Misy safidy hazakazaka telo araka ny tanjak'ireo mpandray anjara , misy ny 3 kilometatra ho an’izay vao hanandrana sy hiditra amin’ity taranja ity. 15 kilometatra ho an’ireo efa zatra mihazakazaka. Ny 31 kilometatra ho an’ireo mpihazakazaka manam-pahaizana sy mitady fanamby lehibe.
Fanampiana ireo ankizy sahirana
Ankoatra ny fanatanjahantena, asa soa lehibe no tanjon’ity hetsika ity. Ny vola rehetra voaangona dia homena ny “Maison de la Nutrition d’Ibity”, fikambanana iray manampy ankizy mihoatra ny 300 isa isan-taona amin’ny ady amin’ny tsy fahampian-tsakafo. Tranga mbola ahiana mafy ny tsy fahampian-tsakafo ary mbola maro ireo fianakaviana no tratran’izany raha ny eto Madagasikara.
Noho izany, "Trail d’Ibity "dia tsy mijanona ho hetsika ara-panatanjahantena fotsiny, fa fahafahana hanampy sy hampahafantatra ny olana ara-tsakafo iainan’ny ankizy. Na ho an’ireo mpihazakazaka efa zatra na ho an’izay tia natiora sy asa soa, hahafahana tsara miaina traikefa manokana ny "Trail d’Ibity". Nanamafy ireo tompon’andraikitra fa mbola misokatra ny fisoratana anarana amin'izao fotoana.
