• Cours de change
  • 4 399,93 AR
  • |
  • $3 987,83 AR
Copyright Image : © Mpeb
Image
Vaovao

Sehatry ny jono : Filohan'ny fikambanana mpanjono miisa 30 nampiofanana momba ny hai-tarika tao Diana

02/04/2025 11:13 © Moov

Tao anatin’ny fanokafana ny jono mahaloky tao amin’ny Nosy Faly tao amin’ny Faritra Diana dia nanolotra fampiofanana momba ny hai-tarika ho an’ireo filohan’ny fikambanana mpanjono, ny Minisiteran’ny jono sy ny toe-karena manga. Miisa 30 izy ireo ary ho ilainy amin’ny fiarovana ny harena an-dranomasina sy ny fitantanana ireo mpanjono io fiofanana io.

Ho amin’ny fitantanana maharitra

Tafiditra ao anatin’ny Tetikasa ReSea izay tantanin'ny UICN ity fampiofanana ity ary ny Minisitra Mahatante Paubert no nitondra azy. Hampiofanina izy ireo hisian'ny fahaiza-mitarika eny anivon'ny fiaraha-monina indrindra ny fiaraha-monin'ny mpanjono. Ankoatra izay dia anisan'ny nomen'ireo mpanjono fitokisana izy ireo ka tokony mahafehy izany hai-tarika izany. Isan’ny ilaina azy io indrindra ny mikasika ny fiarovana ny tontolo an-dranomasina sy ny fitantanana maharitra ny harena voajanahary anaty ranomasina mba ho tena lovain-jafy tokoa ireo harena ireo.
Anisan'ny nampatsiahivan'ny Minisitra ny maha zava-dehibe ny fanajana ireo lalàna mifehy ny Jono eto Madagasikara sy ny fanajana ny fitaovam-panjonoana rehetra. Nampatsiahivina ihany koa ny antony mampihena ny vokatra ateraky ny fiovaovan'ny toetr'andro ary ireo dina isan-karazany hanatsarana ny tontolon'ny fanjonoana.

Hampiakarana ny vokatra azo trandrahina

Ilaina io fahaiza-mitariky ny filohan’ny fikambanana io mba hampiakarana ny vokatra trondro azo trandrahina. Raha tsiahivina tamin'ny 3 taona lasa dia mahatratra 30 taonina ny vokatra mahaloky, izay trondro tsara tsiro indrindra sy mampalaza io Nosy io azo. Nidina ho 18 taonina kosa izany tamin'ny 2 taona nohon'ny fandalovan'ny rivodoza Gamane ka ny taona lasa teo dia niakatra 30 taonina indray. Natao indrindra araka izany ny fiofanana mba hahafahana miantoka ny fahabetsahan’ny vokatra azo trandrahina. Amin'ity taona ity kosa, vinavinaina hitombo mihoatra lavitra raha ny vokatra hita nandritra ny fanjonoana teny an-toerana ho an'ny Andro voalohany, fanampin'izany ny habehin'ireo trondro. Mbola antenaina hiakatra hatrany izany amin’ny fampiharana ireo fampiofanana.

Lire la suite

Articles Similaires