Fitsaboana : Ankizy miisa 6 no efa nisitraka fandidiana fo misokatra teto Antananarivo

Ny alatsinainy 24 martsa ka hatramin'ny zoma faha-28 martsa 2025 lasa teo no notontosaina io hetsika fandidiana fo misokatra andiany fahatelo na ny "Mission d'Opération à Coeur Ouvert 3" io. Voalohany tamin’ity taona ity izy io ary mbola hisy andiany telo manaraka, raha ny vinavina.

Nitombo iray ny isan’ny noraisina an-tanana

Vokatry ny fiarahamiasa miaraka amin'ny fikambanana « La Chaîne de l'Espoir » hatrany ity hetsika ity. Tamin’ity andiany fahatelo ity dia nampitomboina ho lasa enina ireo zaza nisitraka io fandidiana fo misokatra io, raha dimy izy ireo tamin’ny andiany faharoa. Raha tsiahivina dia ankizy miisa 60 no miandry ny fotoana handidiana azy, raha ny fanambarana nandritra ny fitokanana ny toerana fandidiana ao amin’io CENHOSOA io.
Tontosa soa aman-tsara ny fandidiana. Mbola arahi-maso eo anivon’ny toeram-pitsaboana ao Soavinandriana hatrany ireo zaza enina nisitraka fandidiana mandrapaha-sitrana tanteraka azy ireo. Tsara ny manamarika fa ahitana mpitsabo manam-pahaizana manokana momba ny fandidiana, momba ny fo, momba ny fameloman’aina sy fampatoriana, mpitsabo mpanampy amin’ny fandidiana, mpitsabo mpanampy amin’ny fampatoriana sy fameloman’aina, mpitsabo mpanampy tsotra ary koa ireo ekipa mpanohana amin’ny ara-pitaovana avy amin’ny roa tonta.

Hetsika miisa 4 amin’ity 2025 ity

Amin'ity taona 2025 ity dia hetsika fandidiana miisa efatra no kasaina ho tanterahina ka io natomboka tamin’ny Alatsinainy faha-24 martsa 2025 lasa teo io ny andiany fahatelo. Vinavinaina ho any amin’ny volana jona any ho any ny andiany manaraka. Raha tsiahivina dia ny volana may 2024 ny andiany voalohany ary ny volana desambra 2024 lasa teo kosa ny andiany faharoa.
Ankoatra izay, ao anatin’ny fiaraha-miasa amin’ny « Chaîne de l’Espoir » ihany dia hisy dokotera miaramila sy mpitsabo mpanampy halefa hiofana momba ny fandidiana fo misokatra atsy amin’ny Nosy La Réunion amin’ity taona ity.