Rovan'i Madagasikara Manjakamiadana : Manomboka ny 23 marsa ny Taombaovao Malagasy Fidiovana 2025
Mikarakara fankalazana ny Taombaovao Malagasy ny Ministeran'ny Serasera sy ny Kolontsaina amin'ity 2025 ity. Eny amin'ny Rovan'i Madagasikara Manjakamiadana no hanatanterahana ny hetsika rehetra amin'izany.
Eny amin'ny Rovan'i Madagasikara Manjakamiadana, vohitra voalohany eto amin'ny Fanjakan'Imerina, no nosafidian'ny Ministeran'ny Serasera sy ny Kolontsaina hankalazana ny "Taombaovao Malagasy Fidiovana 2025".
Hetsika maro hanandratana ireo kolontsaina maha-Malagasy
Samy manana ny fandaharam-potoany ny isam-bohitra Masina tsirairay amin'ny Taombaovao Malagasy Fidiovana 2025. Efa nandefa fampilazana mialoha ohatra ny eny Ambohidrabiby fa hanao fankalazana makotroka. Misy fankalazana ihany koa ny eny Ambohimanga sy Anosimanjaka, izay marihana manokana fa fanamarihana ny Taombaovao Alahamadibe (fankalazana ara-pomban-drazana). Ho an'ireo tsy afaka mamonjy toerana lavitra noho ny antony maro, misy fandaharam-potoana mazava ny eny amin'ny Lapan'i Manjakamiadana.
23 marsa
Manomboka ny alahady 23 marsa ny fankalazana. Fangataham-pitahiana ho an'ny firenena no hatao amin'izany, ao amin'ny Fiangonana Anatirova, amin'ny 2 ora tolakandro. Hitohy hatramin'ny 30 marsa, andron'ny Taombaovao Malagasy kosa ny hetsika.
24-28 marsa
Varotra fampirantiana ireo harena ara-kolontsaina isam-paritra, na asa tanana na vokatry ny tany na sakafo malagasy miavaka. Hampiavaka izany famarotana ny tantely velondray sy reny.
Hisy ihany koa ny velakevitra sy ny takalo. Natao izany mba hampahafantarana ny rehetra mikasika ny Taombaovao Malagasy sy ny hevitra rehetra manodidina izany. Maro ireo mpahay tantara, mpandala fomban-drazana, mpikaroka sy mpianatra no handray anjara amin'izany. Tsy adino ny fitantarana angano.
29 marsa
Fandrehetana ny Afo Tsy Maty ao amin'ny Kianja Masoandro. Mifanandrify indrindra amin'ny fahatsiarovana ny afon'ny fitiavan-tanindrazana tao amin'ireo mpitolona tamin'ny taona 1947 izany.
30 marsa
Fitsofan-drano sy Tatao. Hisy ny fihinanana vary tondrahin-dronono sy tantely.
Fampiraisana ny Malagasy tsivakivolo
Tsara ny manamarika fa tsy anavahana fiaviana na finoana na foto-kevitra ny fankalazana ny Taombaovao Malagasy. Tsy natao ho ana foko iray eto afovoan-tany akory izany fa fety iarahan'ny Malagasy rehetra. Fotoana hanararaotana hitsidihana ny Rova sy ireo fotodrafitr'asa rehetra ao an-toerana ihany koa ny fankalazana, indrindra ho an'ireo mbola tsy teny taorian'ny asa fanamboarana.
"Ny kolontsain'ny fitoniana, antoky ny fahavelomana" no lohahevitra ho banjinina mandritra ny herinandron'ny fankalazana. Natao ho an'ny rehetra ny hetsika rehetra, araka ny nambaran'ny mpikarakara, Printsesy Ratsimamanga Ralandison Fenosoa.
