Vehivavy lasa be mony mandritra ny fitondrana vohoka : ahoana ny atao ?

Ahoana ny fisehon’ny mony manditra ny fitondrana vohoka ?

Araka ny voalaza teo ambony dia ny fikorontanan’ny hormonina ao amin’ny vatan’ny bevohoka no mahatonga ity farany ho lasa be mony. Izany hoe rehefa miditra amin’ny telo volana fahatelo ny vohoka dia mety ho lasa feno mony ny tarehin’ilay bevohoka. Amin’io fotoana io dia miaka-midina be ny famokaran’ny vatany ny « oestrogène » sy « progestérones ». Izany dia mampikorontana ny famokaran’ny hoditra ny « sébum » ka izay no mampirongatra ny mony eo amin’ny bevohoka.
Eo amin’ny tarehy matetika no misy ireo mony ireo fa mety ahitana azy ihany koa ny tratra sy ny lamosina. Toy ireo mony fahita eny amin’ny zatovo dia mety hiendrika « points noirs », mony menamena… ireo mony mandritra ny vohoka ireo.

Ireo fihetsika manampy hiadiana amin’ny mony mandritra ny fitondrana vohoka

Amin’ny ankapobeny dia misinda ho azy ireo mony mandritra ny vohoka afaka fotoana vitsy aorian’ny fiterahan’ny bevohoka. Raha manelingelina sy manorisory ny fisian’izy ireo mandritra ny fitondrana vohoka dia misy ireo fihetsika manampy hiadiana amin’izany :
-Kolokoloina tsara ny fahadiovan’ny hoditra. Tandremana kosa ny vokatra ampiasaina amin’ny fanadiovana sy amin’ny fikarakarana azy mba tsy ho mahery loatra ka mety handratra ny hoditra na koa vao maika hampirongatra ny mony. Vokatra malefaka tsy mitahiry akora simika mahery loatra ny tsara ampiasaina. Mila jerena tsara ihany koa ny karazana vokatra ampiasaina satria misy amin’izy ireny no tsy mety amin’ny bevohoka ;
-Ferana araka izay azo atao ny manao « masques » sy « gommages » mandritra ny fitondrana vohoka. Mety hanimba ny hoditra sy hampisy mony ny fanaovana azy ireny satria lasa somary marefo ny hoditry ny bevohoka ;
-Fadiana ny mikitikitika na mamaky ny mony amin’ny tarehy. Fahazarana iray vao maika mety mitarika fahasarotana ny fanaovana izany. Rehefa vakiana ireo mony dia mety mihitatra ny ratra avelany, indrindra raha nisy mikraoba tafiditra tao anatiny. Ankoatra izay dia mety lasa mamela holatra ireo mony ireo ;
-Tandremana ny sakafo hoanina. Ny fihinanana sôkôlà, charcuteries sy sakafo be menaka dia mety hisy fiantraikany eo amin’ny hoditra, toy ny fipoitran’ny mony. Ny tsara dia sakafo ara-pahasalamana toy ny voankazo sy ny legioma (madio tsara na nomasahana), ny trondro… no atao betsaka noho izy ireo mitondra otrikaina mikolo ny fahasalaman’ny hoditra.

Ny fitsaboana azo atao

Misy ireo karazana fanafody afaka ampiasaina hampitoniana sy hanasitranana ireo mony mandritra ny fitondrana vohoka. Mazava ho azy fa ny mpitsabo irery ihany no afaka mamaritra ny fanafody mety amin’ny bevohoka tsirairay. Fadiana ny manositsositra fanafody tsy nahazoana torolalana avy any amin’ny mpitsabo. Tsy hoe nety tamin’ny olona iray dia ampiasaina ihany koa. Ny fanantonana mpitsabo, toy ny « dermatologue », no vahaolana azo antoka indrindra.