Fiovan'ny vidin-tsolika isam-bolana : Ny "Prétrole" ihany no niaka-bidy

Nanomboka tamin'ny fiandohan'ity taona ity ny fampiharana ny "Mécanisme d'Ajustement Automatique des Prix", fepetra notakian'ny FMI amin'ny fampindramam-bola ho an'i Madagasikara. Isam-bolana izany dia hisy foana ny fanovana ny vidin-tsolika, arakaraka ny vidiny eo amin'ny sehatra iraisam-pirenena. Na izany aza, ferana ho 200 ariary ihany ny fiakarana raha misy izany.

Fiovana azo leferina

Tsy nisy fiovana ny vidin'ny "Essence SP 95" satria nijanona ho 5 320 ar/l izany. Nijanona tamin'ny teo aloha ihany koa ny vidin'ny Gasoil, ka mbola jifaina 4 970 ariary hatrany ny litatra.
Amin'ny ankapobeny, rehefa tsy miova ny vidin'ny Gasoil dia tsy misy fiantraikany firy amin'ny fiainana andavan'andro ny fiovan'ny vidin-tsolika. Io karazan-tsolika io mantsy no tena ampiasain'ireo fiara mpitatitra olona sy entana mivezivezy manerana ny Nosy. Azo antoka izany fa tsy hisedra olana amin'ny vola miditra indray ireo mpitatitra ato anatin'ny iray volana.
"Azo lazaina fa mampitaintaina tokoa ny fanovana ny vidin-tsolika isam-bolana. Sarotra mantsy ny manova ny vola alaina amin'ny mpanjifa, ka misy fotoana miditra fatiantoka mihitsy rehefa miakatra ny vidin'ny Gasoil. Mbola mila fotoana misimisy hizarana amin'izany fanovana vidin-tsolika izany, indrindra ho an'ireo miasa tena eo amin'ny sehatry ny fitaterana", hoy ny mpisehatra eo amin'ny asa fitaterana mpizahatany iray.

Fahasahiranan'ny mpampiasa Pétrole

Azo heverina fa hisy fiantraikany amin'ny fahefa-mividy indray izao fiakaran'ny vidin'ny solika fandrehitra izao. 200 ariary isaky ny litatra be izao mantsy ny fiakarany, ka lasa 3 030 ar/l ny vidiny raha mbola 2 830 ar/l teo aloha. Tsy azo adinoina mantsy fa mbola marobe ireo Malagasy mampiasa Pétrole hahazoana hazavana sy handrahoana sakafo, indrindra ireo mipetraka amin'ny toerana lavitra ny renivohitra.