Fikolokoloana ny hoho : ireo fikafika natoraly tsara atao

Atao « bains d’huile » ny hoho ho mafy tsara sy tsy ho makiana

Isan’ny fomba fikarakarana ny hoho manampy betsaka amin’ny fanamandinana sy ny fanamafisana azy ireo ny « bains d’huile ». Tsotra ny fomba atao : afanaina atao matimaty ny menaka oliva na ny menaka kinana ary atsoboka ao mandritra ny 10 hatramin’ny 15 minitra ny hoho. Manome sakafo ary manamafy ny hoho mora tapaka ireo karazana menaka zavamaniry ireo. Fikafika iray hafa azo atao ny manotra ny hoho sy ny « cuticules » amin’ny diloilo coco mba hanamandinana tsara azy ireo sy hiarovana azy tsy ho makiana.

Kosehana amin’ny voasary makirana ny hoho mba ho fotsy sy mangirana

Ny ranona voasary makirana dia manafotsy sy mampangirana ny hoho. Tena ilaina ny manao ity fikolokoloana ny hoho ity ho an’ireo manana hoho mavo sy tsy mety fotsy na efa sasana tsara aza. Alaina ary voasary makirana iray dia zaraina roa. Ilay silany iny no hikosehana ny hoho mandritra ny minitra vitsy. Mety ihany koa raha potserina ny voasary makirana hahazoana ny ranony. Atsoboka ao anatin’ity farany mandritra ny minitra vitsy avy eo ny hoho. Rehefa vita dia kobanina tsara.

Mampiasa karibonetra hanamafisana ny hoho

Akora natoraly efa fampiasa amin’ny andavanandro ny karibonetra. Azo ampiasaina hanadiovana fitaovana ao an-trano izy io fa afaka ampiasaina hikolokoloana ny vatana ihany koa. Mandaitra amin’ny fanadiovana sy ny fanamafisana ny hoho ny karibonetra. Tsotra ny zavatra atao. Afangaro ny karibonetra sy rano kely mba hahazoana « pâte ». Ity farany no ahosotra eo amin’ny hoho ary kosehana moramora amin’ny borosy nify malefaka ny volony. Kobanina amin’ny rano matimaty rehefa vita. Sady hadio tsara no ho tsy halemilemy intsony ny hoho rehefa mahavatra manao ity fikarakarana ity.