Fahasalamana : tena ilaina tokoa ve ny manao « détox » ?

Inona no atao hoe « détox » ?

Ny teny hoe « détox » dia mamaritra ny fitambarana fomba atao hanesorana ny « toxines » sy ny « toxiques » miangona ao amin’ny vatana. Ny « toxines » moa dia ireo loto voajanahary vokarin’ireo taova ao anatintsika. Ny « toxiques » kosa dia ireo loto sy poizina avy any ivelana, toy ireo avy amin’ny rivotra hiainana, ny sakafo, ny fanafody, ny sigara, ny toaka…
Ny vatana dia ahitana taova atao hoe « émonctoires », toy ny aty, voa, tsinay, hoditra sy avokavoka, izay miasa amin’ny fanadiovana ny ao anaty sy ny fanesorana ara-boajanahary ireo loto sy poizina ireo. Misy fotoana nefa lasa be loatra ireo « toxines » sy « toxiques » ireo ka tsy vitan’ireo taova intsony ny mamoaka azy ka izay no asan’ny « détox ».

Ireo karazana fomba fanaovana « détox »

Misy karazany maro ny fomba fanaovana « détox ». Misy ireo fomba tena malefaka fa misy ihany koa ireo tena mafy. Anisan’izany ny :
-Fisotroana ranom-boankazo na legioma natoraly ;
-Fihinanana sakafo karazany iray irery ihany mandritra ny fe-potoana voafaritra (monodiète) ;
-Tsy fihinanana sakafo mandritra ny fotoana voafaritra (jeûne) ;
-Fihinanana « compléments alimentaires » vita amin’ny zavamaniry, vitamina, mineraly, sns.

Ireo vokatsoa azo amin’ny fanaovana « détox »

Maro amin’ireo olona manaraka « cure de détox » no mitatitra ireo karazana vokatsoa azo amin’ny fanaovana ity fanadiovana ny ao anaty ity. Anisan’ireo vokatsoa nambaran’izy ireny dia voalaza fa ny « détox » dia :
-Mihatsara ny fandevonan-kanina ;
-Mihatsara ny hoditra ;
-Mihamahazo hery ;
-Mihena ny lanja ;
-Mihatsara ny torimaso.

Ireo mety ho lafy ratsy na vokadratsin’ny fanaovana ity fanadiovana ny ao anaty ity

Na dia maro ary ireo mety ho tombontsoa azo amin’ny fanaovana « détox » dia misy ihany koa nefa ireo mety ho vokadratsin’izany :
-Tsy fahampiana otrikaina raha toa ka manao « régimes restrictifs » loatra. Izany hoe mifady karazana sakafo maro ;
-Reraka, marary an-doha, kizitina noho ny fiovan’ny fomba fisakafoanana ;
-Mikorontana na marary ny kibo ;
-Tsy ampy rano (déshydratation) ;
-Mety miteraka fahasarotana ara-pahasalamana eo amin’ny olona manana areti-mitaiza.

Ilaina ary ve ny manadio vatana na manao « détox » ?

Araka ny voalaza teo ambony dia manana taova afaka manadio ara-boajanahary ny ao anaty ny vatana. Amin’ny ankapobeny dia tsy mila manao « détox » hanesorana ireo loto sy poizina ao aminy. Ilaina kosa nefa ny mihinana sakafo ara-pahasalamana sy voalanjalanja, misotro rano tsara, manao fanatanjahantena matetika, tsy mifoka sigara, tsy misotro toaka be loatra… mba hampiasa ara-dalàna ireo taova ireo.
Raha tsy voahaja ireo fomba fiaina ara-pahasalamana ireo dia mety ilaina ny manao « détox » satria lasa miangona be ireo « toxines » sy « toxiques » ao amin’ny vatana. Alohan’ny hanombohana « cure de détox » dia tsara hatrany ny manantona mpitsabo, indrindra raha manana olana ara-pahasalamana na misy areti-mitaiza.