Kamo na tsy marisika hanao fanatanjahantena : inona no atao ?
Resahana ombieny ombieny ireo vokatsoa ara-batana, ara-tsaina sy ara-pahasalamana azo avy amin’ny fanaovana fanatanjahantena na ny fanetsiketseham-batana isan’andro. Maro amintsika nefa no tsy mahavita manohy fa manao fanatanjahantena andro vitsy dia mijanona. Raha kamo na tsy marisika hanao fanatanjahantena ary dia ireto manaraka ireto ny fomba atao hanoherana izany.
Mametraka tanjona mazava sy « réalistes »
Isan’ireo antony mahatonga antsika tsy maharitra amin’ny fanaovana fanatanjahantena dia tsy fametrahana tanjona amin’ny fanatanterahana izany. Mila atao ao an-tsaina ny antony hanaovana fanatanjahantena, ohatra hoe te hikolokolo ny fahasalamana, tsy te hatavy… Avy eo faritana ireo tanjona tratrarina, toy ny hoe « mila mahavita mihazakazaka 5 km ao anatin’ny 30 minitra afaka 3 volana ». Zaraina dingana kely maromaro io tanjona io mba hahamora ny hatratrarana azy. Lasa maharisika hanohy isaky ny mahavita dingana iray.
Misafidy fanatanjahantena tiana
Zava-dehibe ny fahafinaretana mba haharetana amin’ny fanaovana fanatanjahantena. Mila manandrana karazana fanatanjahantena maro mba ahitana izay tena mahafinaritra na tiana ny manao azy. Azo atao ihany koa ny manovaova ny fanatanjahantena atao mba tsy ho mora leo. Mety foana manao fanazarana ao an-trano na any amin’ny toerana fikotranana, miankina amin’izay fanatanjahantena tiana atao.
Ampidirina anatin’ny andavanandrom-piainanana ny fanatanjahantena
Manampy betsaka haharetana sy hananana fahazotoana amin’ny fanaovana fanatanjahantena ny fampidirana azy io anatin’ny fandaharam-potoana amin’ny andavanandro. Misafidy fotoana iray anatin’ny tontolo andro, tsara kokoa raha amin’ny fotoana mampavitrika sy hananana hery, hanaovana ny fanatanjahantena isan’andro. Rehefa mandeha ny fotoana dia lasa fahazaram-piainana izy io ka mandeha ho azy ny fanaovana azy.
