Maitso ahitra : Zaza 450.000 isa no mety ho tratran’ny tsifanjariantsakafo mahery vaika

Loza voajanahary

Tombanana hiisa 1 375 000 ireo mponina iharan’ny tsifanjariantsakafo any amin’ny tapany Atsimo sy Atsimo Atsinanan’i Madagasikara, mandritra ny vanim-potoanan’ny maitso ahitra. Marefo tokoa mantsy ireo Faritra ireo, manoloana ireo loza voajanahary, izay manamafy ny trangana tsifanjariantsakafo mahazo laka any an-toerana. Amin’ny ankapobeny, miaina ao anaty hain-tany ny any Atsimo ary tsy afa-bela amin’ny rivo-doza ny any Atsimo Atsinanana.

Araka ny nambaran’ny filohan’ny fandaharanasan’ny PAM eto Madagasikara, atoa Outman Badaoui, dia ireo Faritra roa ireo no tena iompanan’ny tohana entin’i PAM, amin’izao vanim-potoana maitso ahitra izao. Raha ny any Atsimo Atsinanana manokana, dia nilaza ireo mponina fa mihamafy sy mihalava hatrany ny « sakave », fiantsoan’izy ireo ny maitso ahitra, tao anatin’ireo taona maromaro farany. Rehefa tena tsy mahita ho hanina izy ireo, dia ny ampalibe no lasa foto-tsakafo. Rehefa tena ao anaty sakave anefa, na io voankazo io aza tsy misy, ka lasa mihinana zava-maniry tsy fihinana, toy ny veoveo sy ny ringiritry, ny mponina.

Tohana ara-tsakafo maika

Amin’ity vanim-potoana maitso ahitra ity, nanomboka ny volana ôktôbra 2024 hatramin’ny volana aprily 2025, dia manodidina ny 1,7 tapitrisa no isan’ny Malagasy mila tohana ara-tsakafo maika any amin’ireo faritra ireo. Zaza latsaky ny 5 taona maherin’ny 450.000 isa kosa no ahiana ho tratran’ny tsifanjariantsakafo mahery vaika, araka ny nambaran’atoa Outman Badaoui. Manoloana ireo, tohana ara-tsakafo maherin’ny 18.500 taonina no hozarain’ny PAM any amin’ny tapany Atsimo sy Atsimo Atsinanan’ny Nosy, ho an’olona maherin’ny 800.000 isa. Vola maherin’ny 6 tapitrisa dôlara kosa no hotsinjaraina mivantana amin’ireo tokantrano, mba hamaliana ny filàna ara-tsakafon’izy ireo ao anatin’ny hamehana, ka hahafahan’izy ireo mividy ny sakafo fototra tena ilainy.