USAID sy MINAE : Manamafy ny fiaraha-miasany eo amin’ny sehatry ny fambolena sy ny famokarana ara-tsakafo

Famokarana vary sy fiarovana ara-tsakafo

Fandraisana andraikitra hanatsarana ny seha-pamokarana vary sy ny fiarovana ara-tsakafo eto Madagasikara, io fihaonana io. Ny vary izay foto-tsakafon’ny malagasy ka antony lehibe indrindra hampitomboana ny famokarana azy. Hiompana kokoa any amin’ny faritra atsimo io fiaraha-mientana io amin’ny ankapobeny. Nandritra ny taona maro, ny faritra Atsimo, dia sahirana noho ny tsy fahampian’ny vokatra ara-pambolena. Ho setrin’izany, ny fitondram-panjakana tarihin’ny Filohan’ny Repoblika, Andry Rajoelina, dia nanomboka tetikasa lehibe hanatanterahana ny “Transformation Agricole” na "Fampivoarana ny Seha-pamokarana", izay iantsorohan’ny Ministeran’ny Fambolena sy ny Fiompiana. Nanamafy ny Tale Jeneralin’ny USAID fa hanohana amin’ny fanatanterahana ny tetikasa hatrany izy ireo. Tanjon’io fiaraha-miasa io dia mikendry ny hahazoana vokatra mifanandrify amin’ny filàn’ny Malagasy, sy ny tsena Iraisam-pirenena hanamafisana ny fiarovana ara-tsakafo, ary hampiroboroboana ny fampandrosoana ara-toekarena maharitra.

Paikady maromaro hiarahana miasa

Tanjona ihany koa ny hahazoana vokatra akotry fanampiny 1 tapitrisa taonina isan-taona amin’ny alalan’ny paikady maromaro. Isan’ny hiarahana miasa ao anatin’izany ny fampitomboana ny velaran-tany fambolena ; ny fanarenana ireo tanimbary simba na nilaozana ; ny famoronana tanimbary vaovao ary ny fampiasana masomboly sy zezika voafantina. Hisy ny fanohanana ny toekarena ifotony amin’ny alalan’ny fanatsarana ny kalitaon'ny vokatra hanaraka ny fepetra takian'ny tsena, fanamafisana ny fiaraha-miasa amin’ny sehatra tsy miankina, fampitomboana ny tetikasa, fanohanana ny tantsaha mpamokatra sy ny fanatsarana ny teknika fambolena.