Fotodrafitrasa « Lac Iarivo » : Hatomboka tsy ho ela ny fanorenana

Halalahana ny lalana

Nanamafy izay efa nambaran’ny filoha Andry Rajoelina, ny amin’ny mety ho endrik’ilay tetikasa fanajariana sy fanovana endrika ny manodidina ny « Lac Ivato » sy ny « Rocade Tsarasaotra », ny avy eo anivon’ny Sekretariam-panjakana misahana ny Tanàna Vaovao sy Toeram-ponenana (SENVH). Araka ny fampahafantarana nataon’ity farany dia halalahana ny sisiny roa amin’ny lalana « Rocade » mampitohy an’i Tsarasaotra amin’Ivato, ka hasiana lalana ho an'ny mpandeha an-tongotra sy ny mpandeha bisikileta. Hanjary ho lalana azon’ny fiara 4 hivezivezena (4 voies) izany, ka hisy lalana hatokana ho an'ny fiara mandeha amin’ny herinaratra (bus électrique), izay hampifandray an'Ivato amin'ny faritra Ankorondrano sy Andraharo. Horavahana hazo milahatra sy voninkazo ihany koa ny moron'ny lalana.

Fotodrafitrasa samihafa

Ankoatra izay dia hisy toerana vaovao hajariana, manodidina ny lalana sy ny rano « lac Ivato », izay hisokatra ho an’ny rehetra. Ho hita ao anatin’izany ny toerana fialam-boly, fanaovana fanatanjahantena, fandraisana hetsika maro ary ny « jet d'eau » lehibe hipetraka eo ambonin'ny rano. Hipetraka eo ambonin'ny « lac Ivato » ihany koa ny fotodrafitrasa lehibe mitsingevana, hamokarana angovo avy amin’ny herin’ny masoandro (parc solaire flottant), izay hanampiana ny tosik’angovo ho an'Antananarivo. Ny fametrahana ireo fotodrafitrasa lehibe handraisana ireo hetsika lehibe samihafa iraisam-pirenena moa, dia efa hanomboka tsy ho ela, araka ny fampitam-baovaon’ny SENVH.

Mandrindra ankapobeny ny fanatanterahana ny asa ny SENVH ary mandray anjara amin'ireo asa fanajariana mialoha eny an-toerana ny Faritra Analamanga.