Andro Maneran-tany Tsy Mampiasa Fiara: ‘ndeha ho resahana !
Ankalazaina isaky ny 22 Septambra ny Andro Maneran-tany Tsy Mampiasa Fiara. Izy io dia hetsika fanentanana izay mamporisika ny olona hamela ny fiarany hijanona ao an-trano mandritra ny iray andro ary hisafidy fomba hafa hivezivezena, toy ny mandeha an-tongotra, mitaingina bisikileta, na mampiasa fitateram-bahoaka.Na dia any amin'ny firenena sy tanàna sasany aza no tena ahitana ity hetsika ity, dia hafatra manan-danja ho an'ny rehetra manerana izao tontolo izao no entiny.
Inona marina moa ny Andro Maneran-tany Tsy Mampiasa Fiara?
Hetsika fanentanana natao hampihenana ny fampiasana fiara manokana izy ity. Tsy mikendry ny hanafoana tanteraka ny fampiasana fiara akory izy io, fa kosa manasa ny tsirairay handinika ny fomba fivezivezena andavanandro sy hahita safidy hafa maharitra kokoa.
Any amin'ny tanàna maro eran-tany, dia misy lalana sasany akatona vetivety tsy hidiran'ny fiara amin'io andro io, izany mba hanomezana toerana bebe kokoa ny mpandeha an-tongotra sy ny mpitaingina bisikileta.
Nahoana no noforonina ity hetsika ity?
Miteraka olana maro ny fitomboan'ny isan'ny fiara eny an-dalana, toy ny:
-Fahalotoan'ny rivotra;
-Fitohanana amin'ny fifamoivoizana;
-Fitomboan'ny entona manimba ny tontolo iainana;
-Tabataba any an-tanàn-dehibe;
-Fanjifana solika be loatra.
Noho izany, ny tanjon'ity andro ity dia ny hampiseho fa azo atao ihany koa ny mivezivezy amin'ny fomba hafa, na dia iray andro monja aza, ary mampihena ny voka-dratsin'ny fifamoivoizana amin'ny tontolo iainana sy ny fiainan'ny mponina amin’ny ankapobeny.
Inona avy ireo tombontsoa azo avy amin'ny andro tsy mampiasa fiara?
Maro ireo tombontsoa azo avy amin’ny andro tsy mampiasa fiara ka anisan’izany ireo manaraka ireto :
-Mihatsara ny kalitaon'ny rivotra. Rehefa mihena ny isan'ny fiara mandeha dia mihena ihany koa ny entona mivoaka avy aminy, ka afaka manampy amin'ny fanatsarana ny kalitaon'ny rivotra.
-Mihena ny tabataba. Anisan'ny loharanon'ny tabataba lehibe indrindra an-tanan-dehibe ny fifamoivoizana. Rehefa vitsy ny fiara dia lasa milamina sy mangina kokoa ny manodidina.
-Mamporisika ny olona handeha an-tongotra. Ho an'ny dia fohy dia fomba tsotra sy mora atao hivezivezena ny fandehanana an-tongotra. Sady manampy amin'ny fahasalamana sy ny fanaovana fanatanjahan-tena ihany koa moa izany.
-Mampiroborobo ny fampiasana bisikileta. Amin'ny toerana sasany, ity andro ity dia manampy ny olona hahita indray fa fitaovam-pitaterana mora, mitsitsy vola ary manaja ny tontolo iainana ny bisikileta.
-Manampy handinika ny fahazarana andavanandro. Ny iray amin'ireo tanjona lehibe indrindra amin'ity hetsika ity dia ny hampametra-panontaniana antsika hoe: tena ilaina foana ve ny mampiasa fiara amin'ny dia rehetra atao? Misy rahateo ny dia sy fivezivezena sasany azo atao amin'ny fomba hafa.
Inona no hafatra ho an'i Madagasikara?
Eto Madagasikara, izay ahitana olana momba ny fitohanan'ny fifamoivoizana sy ny fiakaran'ny vidin-tsolika, dia azo raisina ho fanasana handinihana vahaolana fanampiny amin'ny fivezivezena ny Andro Maneran-tany Tsy Mampiasa Fiara.
Tsy natao hampifanandrina ny mpampiasa fiara sy ny mpampiasa fitaterana hafa izy ity, fa kosa mamporisika ny fitadiavana fifandanjana eo amin'ny fandehanana an-tongotra, ny bisikileta, ny fitateram-bahoaka ary ny fiara arakaraka ny filàna.
