Tsy fahampiana vitamina : tandremo fa mety miteraka aretina ara-batana sy ara-tsaina

Ireo karazana vitamina sy ny asan’izy ireny ao amin’ny vatana

Samy manana anjara asa manokana eo amin’ny vatana ny vitamina tsirairay.
-Ny vitamina A dia miaro ny fahasalaman’ny maso sy ny hoditra, ary manamafy ny hery fiarovana ;
-Ny vitamina B (B1, B2, B6, B12, etc.) dia manampy amin’ny famokarana angovo, ny fiasan’ny ati-doha, ny fiforonan’ny « globules rouges » ;
-Ny vitamina C dia ilaina amin’ny fiarovana amin’ny aretina, amin’ny fahasalaman’ny « tissus » sy amin’ny fahasitranan’ny fery ;
-Ny vitamina D dia mitana anjara asa lehibe amin’ny fikoloana ny fahasalaman’ny taolana sy amin’ny fanohanana ny hery fiarovana ;
-Ny vitamina E dia miaro ireo sela amin’ny fahanterana aloha loatra ;
-Ny vitamina K dia ilaina amin’ny « coagulation » ny rà sy amin’ny fikoloana ny fahasalaman’ny taolana.

Ireo mety ho voka-dratsy ara-batana amin’ny tsy fahampian’ny vitamina

Raha tsy ampy ny vitamina, dia mety hiseho ireto soritr’aretina manaraka ireto:
-Reraka sy malemilemy raha tsy ampy ny vitamina B na tsy ampy « fer » ;
-Maina ny hoditra, mora tapatapaka na miongotra ny volo raha toa ka tsy ampy vitamina A, B na E ;
-Manana olana amin’ny fahitana, toy ny hoe tsy mahita tsara amin’ny maizina na koa tena tsy mahita intsony mihintsy amin’ireo tranga sarotra, raha toa ka tsy ampy vitamina A ;
-Malemy ny taolana ary mety hitarika « ostéoporose » raha tsy ampy vitamina D sy K ;
-Mandeha rà ary ela vao sitrana ny fery raha toa ka tsy ampy vitamina C na K ;

Ny voka-dratsy ara-tsaina amin’ny tsy fahampian’ny vitamina

Ny vitamina ihany koa dia tena ilaina amin’ny fahasalama ara-tsaina :
-Ny tsy fahampiana vitamina B6, B12 na « folates » dia mety hanakorontana ny fampokarana « neurotransmetteurs » toy ny « sérotonine ». Izany moa dia mety hitarika fiovaovan’ny fihetseham-po sy hahatonga fahaketrahana ;
-Ny tsy fahampiana vitamina B sy D dia mety hatonga harerahana ara-tsaina sy olana amin’ny fifantohana ;
-Ny tsy fahampiana vitamina B12, indrindra eo amin’ny beantitra, dia mety hahavery saina sy hahavery tadidy.

Ahoana no atao hisorohana ny tsy fahampiana vitamina ?

Mba hisorohana ireo olana ara-pahasalamana vokatry ny tsy fahampiana vitamina dia ilaina ny mihinana sakafo ara-pahasalamana sy voalanjalanja. Anisan’ireo tsara hoanina isaky ny misakafo ny :
-Voankazo sy legioma manankarena vitamina C sy A ;
-« Céréales complètes » sy voamaina noho izy ireo mitondra vitamina B ;
-Vokatra azo avy amin’ny ronono sy trongo matavy mba hahazoana vitamina D ;
-Menaka zavamaniry sy « fruits à coque » noho izy ireo mitahiry vitamina E.
Mety ho ilaina ihany koa ny « supplément vitaminique », indrindra eo amin’ny olona nahazo taona, ny bevohoka sy ireo olona voafetra ny sakafo azony hoanina.