Toliara - RN9 : "Dubaï de Madagascar" Andaboy sy ny Piscine naturelle Mangily

Kanto loatra i Madagasikara. Tsy voatery mivoaka any ivelany vao mahita toerana lafatra, ankafizana torapasika miavaka sy tany efitra mahavariana. Somary mitsofoka lalam-pasika avokoa na ny any Andaboy na ny any Mangily, ka tsara kokoa raha fiara avo sady tsy matahodalana no entina.

Dubaï de Madagascar, Andaboy

Toy ny any amin'ny tany efitra (désert) mihitsy ny any Andaboy. "Dune" no hita voalohany rehefa tonga ao an-toerana, izany hoe havoam-pasika fotsy somary manopy ranom-bolamena. Ao ambadiky ny Dune kosa no misy ny ranomasina.
Eo ho eo amin'ny 6 kilometatra miala ny renivohitr'i Toliara moa no misy an'Andaboy. Mivelona amin'ny jono ny ankamaroan'ireo mponina. Ankoatra ny fanjonoana karazan-trondro moa dia maka orita (poulpe) sy oursin de mer (soky) ireo mponina. Ny tapany maraina no tena manjono ireo mponina, satria mila rano milamindamina izany asa izany. Somary lavitra ny tanàna rahateo ny ranomasina.
Marihana fa tsy mandoro hoditra ny eny Andaboy. Na mibaliaka be aza ny masoandro, mangatsiatsiaka ny rivotra ka mampahazo aina tsara. Tsara kosa nefa raha manao kapa na kiraro rehefa mandeha eny ambony fasika, indrindra any amin'ny faritra misy ny "dune".

Piscine naturelle, Mangily

Tsy dobokely tahaka ny mahazatra ny any Mangily, satria mitambatra amin'ny ranomasina. Mila mandeha lakana araka izany raha te hisitraka ny "Piscine naturelle" : marivo na dia eny ampovoan-dranomasina aza, sady miloko maitso (raha manga ny ranomasina). Hafakely tokoa satria toy ny misaraka mihitsy ny ranomasina sy ilay "Piscine naturelle".
Tsara ny manamarika fa amin'ny maraina, eo ho eo amin'ny 9 hatramin'ny 11 ora no tena tsara hamonjena ilay "piscine naturelle". Mbola iva mantsy ny ranomasina sady zara raha manonja amin'io ora io. Mazava ho azy, misy sambo azo hofaina eny amoron-drano.