Zazakely : oviana no azo lazaina hoe mitohana ny zaza ?

Inona no antony mety mampitohana ny zazakely ?

Ny fitohanana dia ny fahataran’ny fotoana amoahan’ny vatana ny maloto ka mahatonga ireto farany mitoby ela noho ny tokony ho izy ao anaty tsinay. Raha eo amin’ny zazakely dia ny antony voalohany mety mampitohana dia ny fahakamoan’ny tsinay hiasa ara-dalàna. Mety ihany koa izany nohon’ny solon-dronono tsy mety amin’ilay zaza, mandritra ny fotoana manomboka hinanany sakafo, tsy fahampiana « bonnes graisses » amin’ny sakafony…
Antony hafa mety mampitohana ny zaza ihany koa ny fisian’ny ratra kely eo amin’ny lavabodiny ka mahatonga azy mitazona ny kàkà satria matahotra sao marary rehefa mikàkà. Eo amin’ny zaza mianatra madio dia mety miteraka fitohanana ny fanerena na ny fampitahorana azy tsy hikàkà kilaoty. Mety mbola tsy hainy ny tokony atao ka lasa mitazona ny kàkà izy satria matahotra ny ho bedy ohatra.

Oviana no tokony hanahy raha mitohana ny zaza ?

Amin’ny ankapobeny ny zazakely minono amin-dreniny dia mikàkà isaky ny avy minono. Tsy voatery ihany koa nefa satria misy amin’ny zaza sasany minono dia levon’ny vatany avokoa ilay rononon-dreny ka lasa tsy misy loto avoaka. Tsy tokony anahy arak’izany raha toa ka tsy mikàkà ny zazakely rehefa avy minono. Eo amin’ny zazakely misotro solon-dronono kosa dia isaky ny 1 na 2 andro izy no mikàkà. Mety hisy 3 andro moa izany fara fahelany.
Noho izany dia afaka manantona mpitsabo ny ray aman-dreny rehefa tsy mikàkà ao anatin’ny 4 na 5 andro ny zazakely minono ary 3 na 4 andro ny zaza misotro solon-dronono. Eo amin’ny zaza efa somary lehibe, dia mety efa afaka milaza ny zavatra tsapany izy. Miandry 2 na 3 andro dia manantona mpitsabo, indrindra raha mitaraina marary kibo izy.