Sohika na « asthme » eo amin’ny zazakely : ‘ndeha ho resahana
Tsy azo atao tsirambina ny sohika na ny « asthme » eo amin’ny zazakely na dia mety ho afaka ho azy aza izany matetika manomboka eo amin’ny faha 3 taonan’ny zaza. Ahoana ary ny fambaran’ny sohika eo amin’ny zazakely ? Inona avy ireo anton-javatra mety mampisy na mampihombo azy ? Oviana no mila manantona mpitsabo ? Araho eto ireo tsara fantatra mikasika ny « asthme » eo amin’ny zaza.
Ireo fambaran’ny sohika na « asthme » eo amin’ny zazakely
Ny sohika eo amin’ny zazakely dia miseho amin’ny fahasahiranany mihaina tsindraindray ary mety harenina (réversibles). Mety miseho amin’ny fotoana rehetra ny krizin’ny sohika fa amin’ny ankapobeny dia mandritra ny « infection respiratoire » toy ny « rhinopharyngite », rehefa amin’ny toerana misy « allergènes », rehefa miova ny toetr’andro sy rehefa amin’ny toerana misy hamandoana. Mifantoka indrindra amin’ny fahasahiranana miaina ny soritr’aretin’ny sohika eo amin’ny zazakely. Misy ihany koa ireo fambara hafa toy ny hoe :
-Mikoho-maina ;
-Maneno misioka ny tratra rehefa miaina ;
-Reraka ;
-Sahirana rehefa misakafo na misotro ;
-Hatsatra ary mety mangana ny lokon’ny molotra sy ny rantsan-tanana.
Ahoana ny fisorohana ny sohika eo amin’ny zazakely ?
Ny fomba mahomby indrindra hisorohana ny sohika eo amin’ny zazakely dia tsy mamaritra azy io dieny mbola tsy mipoitra izany. Anisan’ireo fambara mila mahamailo mila jerena tsara eo amin’ny zaza ny hoe :
-Mikohoka, mamoaka ranomaso ny maso, sahirana mifoka rivotra ny orona, misioka ny tratra rehefa miaina, ratsy torimaso vokatry ny fahasahiranana miaina ;
-Misy « allergies » miseho eo amin’ny hoditra, toy ny hoe mivaramena, mangidihidy… Raha misy zavatra mampiahiahy dia mila manantona mpitsabo avy hatrany na dia hanao fizahana fotsiny ihany aza.
Ireo anton-javatra mandrisika ny sohika eo amin’ny zaza sy ny ankizy
Ny tontolo manodidina no isan’ny mandrisika ny hatetiky ny sohika. Mifamatotra matetika ireo anton-javatra mampihetsika mivantana na ankolaka ity aretina ity eo amin’ny zaza sy ny ankizy. Anisan’ireo anton-javatra matetika mampisy sy mampihombo ny sohika eo amin’ny zaza sy ny ankizy ny :
-« Environnement » tao am-bohoka. Mety izany vokatry ny fifohan’ny bevohoka sigara, fifampikasohany tamin’ny « allergènes » ka lasa namparefo ny zaza tao an-kibo ;
-Loto eny amin’ny rivotra iainana ;
-Viriosy sasany mahatonga ny sohika na « allergie » ;
-Setro-tsigara (tabagisme passif).
Oviana no mila manantona mpitsabo ?
Samihafa ny trangan’ny sohika eo amin’ny zaza tsirairay. Noho izany dia tsara hatrany ny manantona mpitsabo rehefa mahatsikaritra ny iray na ny maromaro amin’ireo soritr’aretina voalaza teo ambony. Marihana fa ambony kokoa ny hahavoan’ny sohika eo amin’ny zaza raha toa ka misy voa ny ray aman-dreniny.
