Matory be loatra : mety misy vokadratsy ho an’ny fahasalamana ve ?

Olana eo amin’ny fahasalaman’ny vatana

Maro ireo mety ho vokadratsin’ny fatoriana be loatra, na « hypersomnie », eo amin’ny vatana, ka anisan’izany ny :
-Fitomboan’ny « risques » hahazoana aretin’ny fo sy ny lalandrà, fahatapahan’ny lalandrà ao amin’ny loha, fiakaran’ny tosidrà… ;
-Diabeta sokajy 2 satria mety manakorontana ny « métabolisme » ny fatoriana be loatra ;
-Hatavezana diso tafahoatra (obésité) noho ny fihenan’ny fampihetsiketseham-batana sy ny fikorontanan’ny hormonina izay mandrindra ny fahazotoan-komana ;
-Fararian’ny lamosina. Rehefa matory maharitra loatra dia mety tsy mivadi-mandry matetika ka lasa mitarika na mampihombo ny fanaintainan’ny lamosina ;
-Aretin’andoha. Mety mankarary an-doha ny fatoriana ela be loatra eo amin’ny olona sasany.

Fiantraikany eo amin’ny fahasalaman’ny saina

Mety misy fiantraikany eo amin’ny atidoha ihany koa ny fatoriana be loatra :
-Fampihomboana ny soritr’aretin’ny fahaketrahana ;
-Tebiteby ;
-Fahasahiranana mifantoka sy mitadidy ;
-Fahatsapana reradreraka sy toy ny kely hery.

Ahoana no atao raha mahatsiaro matory be loatra ?

Raha mahatsapa tena fa lasa diso matory be loatra mihoatra ny ara-dalàna dia tsara hatrany ny manantona mpitsabo. Ny fatoriana be loatra dia mety ho fambarana olana ara-pahasalamana, toy ny « apnée du sommeil », fahaketrahana na koa aretina hafa.
Etsy andaniny dia misy ireo torohevitra manampy hanatsarana ny torimaso, toy ny :
-Fametrahana ora raikitra hatoriana sy hifohazana, eny na rehefa andro tsy fiasana na fianarana aza ;
-Fanatsarana ny toerana fatoriana, izany hoe atao maizina, mangina sy mangatsitsiaka ny efitra atoriana ;
-Ferana tsy atao mihoatra ny 20-30 minitra ny fatoriana atoandro (siestes) ;
-Fadiana ny misotro toaka na kafe rehefa alohan’ny hatory ;
-Fanaovana fanatanjahantena matetika.