Fampirafesana : Sady hadisoana no heloka, araka ny lalàna malagasy
Niteraka resabe tany anaty tambajotra sôsialy androany 25 martsa 2025, ny filazana fikarohana vehivavy iray navoakan’ny Polisim-pirenena tany Mahajanga, izay itadiavana ny vehivavy iray voalaza ho nifankatia tamin'ny vadin’olona. Maro no nametra-panontaniana, raha tena antony tokony hamoahana fikarohana tokoa izany. Tena sazian’ny lalàna velona eto Madagasikara ny fiarahana amin’ny vadin’olona sy ny fampirafesana, hoy ny mpahay lalàna.
Mahazo sazy mitovy
Ny tsara ho fantatra voalohany, dia mamoaka filazana fikarohana ny mpitandro ny filaminana, rehefa misy olona tokony ho hadihadiana, na manana raharaha ara-pitsarana, nahazo fiantsoana momba izany, nefa tsy tonga teny amin’ny toerana voatondro fa tokony anatonany. Amoahana fiantsoana ihany koa ny olona tokony hamita sazy, taorian’ny famoahana didy teo anivon’ny Fitsarana, saingy nandositra, ka tsy hita.
Ny tsara ho fantatra manaraka, dia sazian’ny lalàna malagasy ny fiarahana amin’ny vadin’olona ara-dalàna, sy ny fampirafesana ataon’ny olona iray manambady, vita soratra ara-panjakana. Ny Fehezan-dalàna famaizana, ao amin’ny andininy 336 hatramin’ny 338 no mamaritra izany ho heloka ary hadisoana kosa izany eo amin’ny lalàna sivily, araka ny lalàna 2007-022. Sokajiana ho fijangajangana ilay tranga, raha toa ny olona iray manambady ara-dalàna ka nanao firaisana ara-nofo tamin’olona tsy vadiny. Raha araka ireo fanazavana avy amin’ny mpahay lalàna ireo, dia azo karohina noho ny hadisoana sy heloka nataony ilay vehivavy namoahana filazana fikarohana, rehefa voamarin’ny fanadihadiana ny zavatra nataony. Mitovy ny sazy omen’ny Fitsarana azy sy ilay lehilahy niaraka taminy.
Antony roa ahafahana mangataka fisarahana
Isan’ny nampiady hevitra ny olona ihany koa ny hoe : nahoana raha misaraka fotsiny rehefa tsy misy ny fitiavana ary tsy zaka ny fampirafesana ? Nanamarika ny mpahay lalàna fa eto Madagasikara dia tsy azo raisina ho antony angatahana fisaraham-panambadiana ny tsy fisian’ny fitiavana intsony eo amin’ny mpivady. Antony roa no azon’ny Fitsarana raisina, dia ny tsy fanatanterahan’ny iray amin’ny mpivady ireo adidy aman’andraikitra tokony tontosainy ao an-tokantrano, ka mahasarotra ny fiaraha-miaina. Ny antony faharoa dia ny fijanganjangana.
Ny tompom-bady ihany moa no afaka mitory ny vadiny sy ilay rafiny, miaraka amin’ny porofo, fa tsy misy olon-kafa, toy ny havana na namana, afaka mitory olona iray heverina fa nanitsakitsaka tokantrano, raha ny lalàna velona eto Madagasikara.
