Adiny iray ho an’ny tany : Nahatratra hatramin’ny 24 179 ora ny hetsika rehetra nataon’ireo mpiaro ny tontolo iainana
Hankalazaina maneran-tany, isaky 22 martsa ny adiny iray ho an’ny tany. Isan’ny nanana hetsika maro tamin’izany i Madagasikara. Fanatanterahana fihetsika sy hetsika natao hiarovana ny tontolo iainana mandritra ny 60 minitra io fotoana io. Nandray anjara mavitrika tamin’izany ny Malagasy, izay nahatratra 24 173 ora ny totaliny, hoy ny tatitry ny WWF Madagasikara. Manapoforo izany fa zava-dehibe amin’ny Malagasy ny fiarovana ny tontolo iainana ka hanolorany tena betsaka amin’ny alalan’ny fomba maro samihafa.
Lohalaharana ny tanora
Ny fifanentanana samy tanora sy ny fanentanana ho an’ny olom-pirenena avy amin’izy ireo no nitarika ny fahombiazan’izany hetsika izany. Niakatra avo roa heny noho ny teo aloha mantsy ny zava-bita ary ireo tanora no tena betsaka nandray anjara. Ohatra, olona an’arivony no nentanin’ny fikambanana toy ny Alliance Aika, Move Up Madagascar ary ny Namako ny Tany mba handray anjara mavitrika amin’ireo hetsika.
Isan-karazany ireo hetsika nanehoan’izy ireo ny fiarovana ny tontolo iainana. Nanomboka tamin’ny fambolen-kazo ka hatramin’ny hetsika fanadiovana, teo ihany koa karazana fanentana ny tanora. Tamin’ny alalan’ireo ezaka ireo no nanaporofoan’ny tanora malagasy fa vonona ny hiatrika ny olana ara-tontolo iainana ankehitriny sy ny ho avy, izy ireo.
Hetsika manerana ny Nosy
Faritra valo teto Madagasikara no nahitana hetsika. Tao anatin’izany dia olona an'arivony no nandray anjara tamin'izay nokarakaraina. Tany Menabe, maherin’ny 12.000 ny hazo novolena ary 500 ny mpilatsaka an-tsitrapo tamin’ny fanadiovana ny tora-pasika. Tao Maintirano, 150 no nandray anjara tamin’ny fanadiovana narahina diabe fanentanana. Tao Ambilobe sy Antsiranana, olom-pirenena 2600 no nihetsika ho amin’ny fahadiovana an-tanàn-dehibe. Nisy hetsika hafa natao tany Mahafaly, Bealanana, Andapa ary Sambava, nahitana olona an'arivony.
Fandraisana anjara ankolaka
Ankoatra izay dia nahavory olona maro ihany koa ireo hetsika tsy tonga dia mivantana amin’ny tany na ny tontolo iainana. Namory mpandray anjara miisa 800 ny lalao manodidina ny Earth Hour teto Antananarivo. Teo ihany koa ny fifanakalozan-kevitra momba ny tontolo iainana samihafa. Tetsy andaniny, ny WWF izay niara-niasa tamin'ny Miarakap, dia nanasongadina ny fihetsika andrasana amin’ireo orinasa sy mpandraharaha ho fiarovana ny tontolo iainana.
Fanampin'izany, nahatratra olona 410.459 ny fanentanana ara-nomerika, niaraka tamin'ny fandraisana anjaran’olona miisa 11 696 tao amin'ny tambajotra sosialy.
Ity adiny iray ho an’ny tany 2025 ity dia nanamafy fa vonona amin’ny fiovana ara-tontolo iainana i Madagasikara ary zava-dehibe ho azy ny fitazonana izany fihetsehana izany ho amin'ny hoavy maharitra kokoa.
