Tsenaben’ny Fizahantany andiany faha-9 : Matianina amin’ny fizahantany miisa 28 no hampiranty

Mampiroborobo ny fizahantany anatiny

Misarika ny tera-tany malagasy mba hijery sy hitsidika ny taniny ny ministeran’ny Fizahantany sy ny Asa Tanana. Midadasika rahateo i Madagasikara ary maro karazana ireo toerana azo tsidihina isaky ny Faritra eto amintsika. Mahavariana ny vahiny, ary anentanana ny Malagasy ihany koa mba ho liana aminy, ireny faritra arovana, ahitana biby sy zavamaniry tsy manampaharoa ireny.

Isan’ny antom-pisian’ny Tsenaben’ny Fizahantany izany, izay fotoana ampahafantaran’ireo matianina amin’ny fizahantany ny tolotra ananany. Miisa 28 izy ireo, amin’ity taona ity, no hampahafantatra sy hampiranty ireo tolotra omeny, ho an’ireo ho avy hitsidika. Natao ho an’ny fizahantany anatiny ny hetsika, ka hanome tolotra maromaro mba hahafahan’ny Malagasy mijery ny taniny, hanjifa ireo tolotra arakaraky ny fahefa-mividy sy ny safidy misy any an-toerana, ireo matianina amin’ny fizahantany, hoy Ramarolahy Sandra Afick, tale jeneralin’ny fizahantany eo anivon’ny ministeran’ny Fizahantany sy ny Asa Tanana.

Tolotra isan-karazany

Araka izany, mandritra ity hetsika Tsenaben’ny Fizahantany andiany faha-9 ity, dia hisy ny tolotra efa mahazatra, hisy ihany koa ny tolotra vaovao, fa indrindra, hisy fihenam-bidy, izay fanararaotra ho an’ireo mpitsidika izay manomana ny fialan-tsasatra, manomboka amin’ny fialan-tsasatry ny Paska izay efa tsy ho ela intsony ka hatramin’ny fialan-tsasatra amin’ny faran’ny taona. Tsy ireo ''tour opérateur'', mpikarakara dia ihany no ho hita eny an-toerana, fa hampahafantatra ny tolotra misy ao aminy ihany koa ireo trano fisakafoana, ireo trano fandraisam-bahiny sy ireo mpitaridia.

Miara-mikarakara ity hetsika ity amin’ny ministeran’ny Fizahantany sy ny Asa Tanana ny Ôfisy Nasiônalin’ny Fizahantany eto Madagasikara. Manohana kosa ny Tetikasa PIC sy ny Madagascar National Park, izay mitantana ireo Faritra arovana eto amintsika.