Famarinana olona tany Cameroun : Mila mailo amin’ireo tolotr’asa avy any ivelany, hoy ny ministeran’ny Raharaham-bahiny
Namoaka fanambarana, androany 24 martsa 2025, ny ministeran’ny Raharaham-bahiny malagasy, manoloana ny tranga fitazonana an-keriny tera-tany malagasy, tany Yaoundé Cameroun. Nambaran’ny fampitam-baovaon’ny ministera, fa manaraka akaiky ity raharaha ity ny Fanjakana malagasy.
Olona 13 isa nogiazana
Raha tsiahivina, vehivavy miisa 4 ary lehilahy miisa 9, avy aty Madagasikara sy avy any amin’ny Repoblika Demôkratikan’i Congo, no nisy nitazona an-keriny nandritra ny volana maro, tany Cameroun. Avotry ny zandary any Yaoundé ireto olona ireto, ny alakamisy 20 martsa lasa teo. Araka ny fantatra dia namaly tolotr’asa, izay mampanantena asa tsara sy karama tsara ireto olona ireto, asa izay amin’ny sehatra isan-karazany toy ny fitantanam-bola, ny fitsaboana… Saingy rehefa tonga tany Yaoundé Cameroun vao nahalala fa mpisoloky ireo olona nisarika azy ireo ho avy any an-toerana.
Nogiazana tao amin’ny trano anankiray izy ireo, tsy nomena sakafo sy rano hosotroina, ary noterena hiantso ny fianakaviany mba handefa vola any amin’ireo mpisoloky. Ahiana ho tratran’ny fanararaotana ara-nofo ihany koa aza ireo vehivavy, araka ny nambaran’ny lieutenant-colonel Georges Parfait Nana, miandraikitra ny fanadihadiana any Yaoundé.
Famarinana olona
Olona akaiky ny iray amin’ireto nogiazana ireto no nampilaza ny zandarimaria any an-otoerana, ka nahafana nanao ny fisavana. Olona telo, voarohirohy tamin’ny famitahana ireto olona ireto, no efa voasambotra ankehitriny. Telo volana lasa izay, dia efa nisy ihany koa ny fahatrarana olona am-polony nogiazana an-tsokosoko toy izao, tany Bafoussam, any avaratra andrefan’i Cameroun.
Nambaran’ny fampitam-baovaon’ny ministera, fa miara-miasa akaiky ny ministeran’ny Raharaham-bahiny malagasy sy ny ao Cameroun ary ireo ambaratongam-pahefana rehetra voakasika, mba ahafahana miaro sy manampy ireo Malagasy tratran’ny fanararaotana ireo. « Manamafy ny firotsahany amin’ny ady amin’ny famarinana olona ny Governemanta malagasy ary miantso ny olom-pirenena rehetra mba ho mailo, manoloana ireo tolotr’asa avy any ivelany », hoy ny fanambarana.
Raha ny navoakan’ny fampahalalam-baovao any Cameroun moa dia misy vehivavy malagasy hafa miisa 6 ihany koa, efa miomana ny handeha ho any Cameroun, rehefa nahita ity tolotrasa fitaka ity.
