Tontolo iainana : Andro iray ho an’ny tany, rahampitso eny amin’ny Lapan’ny Fanatanjahantena

Fiarovana ny tontolo iainana

Tamin’ny taona 2007 no namoronan’ny fikambanana iraisam-pirenena miaro ny tontolo iainana (WWF) ity hetsika « Adin’ny Iray ho an’ny Tany » ity. Ny fomba mahazatra indrindra fanao, dia vonoina avokoa ireo jiro elektrika mandravaka ireo vakoka lehibe maneran-tany, na ny toeran-kafa sy ny isan-tokantrano ihany koa aza, eo anelanelan’ny amin’ny 8:30 alina ka hatramin'ny 9:30 alina. Ankoatra izay dia fomba maro, mikendry ny fiarovana ny tontolo iainana, no entin’ny olona maneran-tany manamarika ity andro ity : fambolen-kazo, fanadiovana ny tontolo manodidina, famelabelaran-kevitra… Tsy voatery ho ora iray ihany koa no atokana ho an’ny tany, fa mety ho tontolo andro, na andro maromaro mihitsy aza.

Ny Consortium des Jeunes "Mahery" ao Morondava, any amin’ny Faritra Menabe, izao, dia efa nanatanteraka fambolena honko tao Kimony, androany maraina. Honko tangambavy sy tangadahy miisa 12 000 mahery no novolen’ny tanora 120 isa. Nialohavan’ny fifampiazarana ara-teknika momba ny fambolena honko, notarihin’ny solontena avy ao amin’ny fitaleavam-paritry ny Tontolo Iainana sy ny Fandrosoana Lovainjafy ao Menabe, izany. Mbola hitohy rahampitso ny hetsika, amin’ny fanadiovana ny moron-dranomasina, diabe sy fanentanana maro isan-karazany.

Tontolo andro ho an’ny tany

Eto Antananarivo kosa, rahampitso 22 martsa 2025, dia misy ny hetsika « Malagasy Earth Hour Game Festival », tanterahina eny amin’ny lapan’ny Fanatanjahantena sy ny kolontsaina Mahamasina. Miara-mikarakara izany ny ministeran’ny Tanora sy ny Fanatanjahantena, ny WWF, ny UNICEF sy ny fikambanana maro samihafa. Tontolo andro natokana ho fanentanana amin'ny fiarovana ny tany io, amin'ny alalan'ireo kilalao maro samihafa izay nomanin'ireo vondron'ny tanora mpandray anjara.

Mandritra izany dia hisy ny fanentanana an-tsehatra isan-karazany, toy ny slam, zumba, fifaninanana « miss et mister » … Misy ihany koa ireo trano heva ahafahana manao lalao mahafinaritra mifandraika amin’ny tontolo iainana, nomanin'ny fikambanan'ny tanora. Amin'ny 10 ora dia misy ny tafatafa arahina adihevitra momba ny entona karibaonina. Ny tolakandro, manomboka amin’ny 2 ora sy sasany, dia hanatanteraka fampisehoana i Nate Tex sy Mirado.

Tsy misy ny vidim-pidirana amin’ireo hetsika ireo, izay mikendry ny fanovozana fahalalana ho an’ireo tanora, hialana voly ihany koa, ary indrindra, ho fandraisana anjara amin’ny fanomezana adin’ny iray ho an'ny tany.