• Cours de change
  • 4 399,93 AR
  • |
  • $3 987,83 AR
Copyright Image : © Moov
Image
Vaovao

29 Marsa 1947 - 29 Marsa 2025 : Feno 78 taona ny Tolompanafahana !

29/03/2025 09:54 © Moov

Tsarovana androany sabotsy 29 marsa 2025 ny faha-78 taonan'ny Tolompanafahana. Efa herinandro izay no nanatanterahana ny hetsika fankalazana isan-karazany, ka mifarana androany.

Raha tsiahivina, tamin'ny taona 1896 i Madagasikara no lasa zanatany Frantsay. 60 taona mahery izany isika vao niverina indray ny fahaleovantena. Noho ny tolona nataon'ireo maherifo tamin'ny taona 1947 no antoka nahazoana izany fahaleovantena izany.

Fametraham-boninkazo

Tahaka ny isan-taona, teny amin'ny Fasan'ny Maherifo Avaratr'Ambohitsaina, no nanatanterahana ny fametraham-boninkazo. Vao maraina dia efa nanakoako teny Mausolée ny hira "Madagasikara, Tanindrazanay, Tany sarobidy masina sy soa, Lovasoa nomen’ny Razanay taloha, Maty ho anao ny tena lazanay… Mitsangana ry tanora, Mitsangana aza manana ahihahy, 'Zao no andro sady ora, Mijoroa sahia tokoa ho lehilahy". Ny filoham-pirenena Andry Rajoelina no nitarika ny lanonanana, niaraka tamin'ny Minisitry ny Foloalindahy, ny Jeneraly RAZAFITOMBO Maminirina Ely. Nanatrika ny fotoana ihany koa ny mpikambana ao amin'ny Governemanta sy ireo olom-boafidy sy voatendry maro eto amin'ny firenena.
Nisy ny fanolorana fanomezana ho an'ireo zokiolona mpitolona, akanga sisa nanamborana, teny Mausolée ihany. Nandritra ny lahateniny,nanome toky ny filoham-pirenena Andry Rajoelina fa ny Fitiavan-tanindrazana no mirehitra ao am-pony, ka izany no hahafahany manome toky fa tsy maintsy mandroso i Madagasikara.

Fanilo miampita

"Ho fanilo miampita ho an'ny taranaka ny fitiavan-tanindrazana" : izany no lohahevitra banjinina amin'izao 29 marsa izao. Narehitra indray ny Afo teny amin'ny Fasan'ny maherifo ho fahatsiarovana sy fanamarihana ny afon'ny fitiavan-tanindrazana. Ohatra tsara ho an'ireo rehetra mantsy, indrindra ireo tanora, ny tolona nataon'ireo maherifo tamin'ny taona 1947.
Tsy ny eto Antananarivo ihany no misy hetsika fankalazana. Hiavaka ny lanonana any Moramanga sy Manakara amin'ity taona ity. Ankoatra ny fametraham-boninkazo eny amin'ny tsangambaton'ny maherifo, hisy ny fanokanana amin'ny fomba ofisialy ny Akany Fiadanantsoa any Moramanga. Natokana hampiantranoana sy hikarakarana manontolo ireo beantitra nandray anjara mivantana na ankolaka tamin'ny tolona 1947 io akany io.
Tsara ny manamarika fa ny 26 sy ny 27 marsa lasa teo dia efa nisitraka fizaham-pahasalamana maimaimpoana tao amin'io Akany ao Moramanga io ireo mpiady Tia Tanindrazana sy zoky olona mihoatra ny 65 taona tao Moramanga sy ny manodidina.

Lire la suite

Articles Similaires