29 marsa 2025 : Andro farany amin'ny Taona, fiandrasana ny Taombaovao Malagasy

Efa miha-miverina indray ny hafanam-pon'ny Malagasy amin'ny fankalazana ny Taombaovao Malagasy. Tato anatin'ny 5 taona teo ho eo, miha-mitombo hatrany ireo mpankalaza izany, indrindra ny eto Antananarivo sy ny manodidina. Misy ihany koa nefa ireo vondrona maro any amin'ny faritany, izay manana fandaharam-potoana manokana. Efa nahatontosa ny azy izao ireo mpianatra eo anivon'ny Oniversiten'i Mahajanga.

Toeram-pankalazana azo isafidianana tsara

Maromaro ny Vohitra Masina mankalaza ny "Taombaovao Malagasy Fidiovana 2025". Anisan'izany ny eny Ambohidrabiby, Ambohidratrimo sy Analamanga Manjakamiadana. Misy fety makotroka ihany koa eny amin'ny Kianjan'ny Kanto Mahamasina ho an'ireo eto Antananarivo Renivohitra.
Ny fandraisana sy fizarana ny Afo Tsy Maty no tena mampiavaka ny andro androany. Misy ihany koa ireo hanatanteraka fidiovana raha nisy efa nahavita izany. Rehefa harivariva maty masoandro, hanao arendrina ireo ankizy rehetra. Tsiahivina fa fetim-pirenena Malagasy mihitsy mantsy ny Taombaovao Malagasy tamin'ny vanim-potoana faha-mpanjaka.
Rehefa vita ny arendrina, miroso amin'ny totorebika ny rehetra : "réveillon" hiandrasana ny taona vaovao. Samy manana ny fandaharam-potoany moa ireo toerana tsirairay mandray ny fankalazana. Ny eny amin'ny Rovan'Ambohidrabiby ohatra, efa misy ny fandaharana mipetrapetraka tsara, izay hanomboka amin'ny 12 ora sy sasany, ka vakodrazana sy Kabary fisantarana no ho tanterahina mialoha. Amin'ny 1 ora sy sasany Tolakandro ny fandrehetana ny Afo tsy maty. Amin'ny 2 ora sy sasany kosa ny fidiovana any Andohalo (toerana misy ny fatsakan'ny Mpanjaka ao Ambohidrabiby ihany).
Amin'ny 6 ora hariva ny arendrina. Amin'ny 7 ora hariva kosa dia hisy ny fandroana. Manomboka amin'ny 8 ora alina mandra-maraina ny totorebika hiandrasana ny taona vaovao.

Fizarana ny Afo Tsy Maty

Hisy ny fizarana ny Afo Tsy Maty manerana ny toerana maro eto Antananarivo sy ny manodidina, ho an'ireo izay tsy afaka mandeha lavitra.
-Antananarivo II : EPP Ambanidia, 3 chemins Ampohipo, Sampanan'i Mahazoarivo, Mascotte Antsahabe, Rond point Tsimbazaza, Mausolée
-Antananarivo III : Ankadifotsy (ambony tetezana), Tany malalaka Besarety
-Antananarivo IV : Pharmacie Volahanta taloha, Fihaonan'Anosipatrana sy Anosizato, Boulevard Namontana, 67ha (Rond Point Mad Inox, CENAM Art Malagasy)
-Antananarivo V : Gamo Soavimbahoaka, Ambohimirary terrain KOMA, Société Akanjo Ambatomaro, Sampanan'i Soamanandrariny, EKAR Manjakaray, Coliseum Analamahitsy, Rond point Andranobevava
-Antananarivo VI : Sampanan'ny Terrain de Basket Anosisoa, Arret Bassin Anosivavaka, 3 chemins Pullman
-Itaosy : Terminus 133 Cité, Sampanan'i Vinany, Ratsimamanga, Horizon
-Avaradrano : Ankadikely (SOMACOU), Tampon-tanànan'i Sabotsy, Antsofinondry (Vahalava), Sampanan'i Fiombonana Marobiby
-Atsimondrano : Sampanan' Imerimanjaka (pavé A/fotsy), Fiadanamanga (Arret bus), 4 chemins Ambohimanala, Barberot Ankaraobato, Bevalala (terrain akaikin'ny kianja maitso), Arret bus 35 Tanjombato, Terrain be Ampitatafika (Mateza Tole), Stationnement Manalalondo, Tsena Alakamisy Ambohidrazana (Parking), Ankadilalana Ampitatafika (Bajaj)
-By-pass sy ny manodidina : Jovena Androndrakely (Terrain be), Arret bus Ampahimanga (Ambohimanambola), Rond point Ambohimangakely (Ambodivoara), Terminus 192 (Bypass), Domaine Alasora, Sary Masina Ambohimahitsy
-Distrikan'Ambohidratrimo : Ambohijanahary Supermaki, Ambohibao Pharmacie, Talatamaty (zaridaina), Ivato eo amin'ny Sary Masina, Sampanan'Ambohitrimanjaka, Andranotapahana (lalam-baovao lehibe), Ambohidratrimo Coca, Tranompokonolona Mahitsy, Ankazobe
-Itasy : Imerintsiatosika (pavé ambanin'ny CEG)