Bevohoka : ireo torohevitra hisorohana ny tsatsakaotra sy ireo olan’ny hoditra

Ny fomba atao hisorohana ny tsatsakaotra mandritra ny fitondrana vohoka

Manaratsy endrika ny hoditra nefa dia sarotra esorina ary tsy mety afaka tanteraka ny tsatsakaotra. Ny hany azo atao dia ny misoroka azy ireny mandritra ny fitondrana vohoka. Anisan’ireo manampy hisorohana na hamerana ny tsatsakaotra ary ny :
-Fanamandinana ny hoditra isan’andro. Tena ilaina tokoa ny fanaovana izany mba hitazomana ny « élasticité » ny hoditra. Hosorana « crème » na « huile hydratante » isa-maraina sy hariva ary ny faritra mety hisy tsatsakaotra, toy ny kibo, ny vata-nono, ny fe sy ny fitombenana.
-Fihinanana sakafo voalanjalanja. Ny sakafo manankarena vitamina sy mineraly dia mandrisika ny famokarana « collagène » sy « élastine » izay tena ilaina amin’ny « souplesse » ny hoditra.
-Fitomboana lanja tsikelikely. Mampitombo ny « risques » mampisy tsatsakaotra ny fitomboana lanja be tampoka mandritra ny fitondrana vohoka. Mba hisorohana izany dia mihinana sakafo voalanjalanja ary mampihetsika vatana tsara mba hitombo tsikelikely ny lanja.
-Fanorana ireo faritra mety hisy tsatsakaotra amin’ny « huile » na « crème hydratante ». Izany dia mandrisika ny fikorian’ny rà ary manatsara ny « élasticité » ny hoditra.

Fisorohana ireo olan’ny hoditra hafa rehefa bevohoka sy ny vahaolona amin’izany

Ankoatra ny tsatsakaotra dia maro ireo olana eo amin’ny hoditra hafa mety miseho mandritra ny fitondrana vohoka. Ireto manaraka ireto ary ny fomba manampy hisorohana azy ireny sy ny atao hampisinda azy :
-Mampiasa « écran solaire » hiarovana amin’ny masoandro ary tsy mitaninandro maharitra mba hisorohana ny « masque de grossesse » na ireo tasy matroka miseho eo amin’ny hodi-tava mandritra ny fitondrana vohoka.
-Diovina tsara amin’ny « produit » malefaka ary tsy « comédogène » ny hodi-tava mba hisorohana ny mony. Marihana moa fa ny fikorontanan’ny hormonina eo amin’ny bevohoka no antony mampirongatra azy ireny. Fadiana ny mamaky ny mony amin’ny tarehy.
-Mampiasa « produit » malefaka sy manamandina ny tarehy satria ny mety ho lasa makiana sy marefo ny hodi-tava vokatry ny fikorontanan’ny hormonina mandritra ny fitondrana vohoka. Fadiana ny mampiasa rano mafana be loatra rehefa mandro sy manasa tarehy.
-Hamandinina matetika ny hoditra ary manao akanjo malalaka sy « coton ». Izany dia mba hisorohana ny hidihihy, indrindra eo amin’ny kibo, izay matetika mitrangra mandritra ny fitondrana vohoka.
-Manantona mpitsabo raha mihitatra na manelingelina be loatra ireo olana eo amin’ny hoditra mandritra ny fitondrana vohoka.