Bevohoka manao tevidoha : ireo tsara fantatra

Ireo antony mety mahatonga ny tevidoha eo amin’ny bevohoka

Maro ireo anton-javatra mety mahatonga ny bevohoka manao tevidoha. Anisan’izany ny :
-Fitomboan’ny habetsaky ny rà. Mandritra ny fitondrana vohoka dia mitombo be ny rà ao amin’ny vatan’ny bevohoka. Izany dia mahatonga « pression » mafy ao amin’ireo lalandrà malemy ao amin’ny orona ;
-Fikorontanan’ny hormonina. Rehefa miakatra ny hormonina, indrindra ny « œstrogènes », dia mety mampivonto sy mahamaina ny « muqueuses nasales » ka mahatonga ireto farany handeha rà ;
-Fahamainana ao anaty orona. Ny rivotra maina, indrindra rehefa ririnina na main-tany, dia mety mahamaina ny « muquuses nasales » ka mampandeha rà orona ;
-Fahatsentsenan’ny orona. Matetika ny bevohoka dia tsentsitsentsina ny orona vokatry ny fiovan’ny hormonina. Mety mampanao tevidoha azy moa izany.

Inona no atao raha manao tevidoha ny bevohoka ?

Raha manao tevidoha na mandeha rà orona mandritra fitondrana vohoka dia toy izao no tsara atao :
-Mipetraka ary somary miondrika kely (tsy miondrika be) ;
-Tsongoina moramora mandritra ny 10 na 15 minitra eo amin’ny faritra malemin’ny orona, ilay eo ambonin’ny taolana ;
-Miaina amin’ny vava ;
-Petahana compresse mangatsiaka eo amin’ny orona ;
-Tsy mahazo ahisina na miondrika ao anatin’ny ora maro aorian’ny tevidoha.

Oviana no mila manantona mpitsabo ?

Araka ny voalaza teo ambony dia tsy dia tokony misy atahorana ny bevohoka manao tevidoha. Mila manantona mpitsabo kosa nefa raha toa ka :
-Be dia be ny rà mivoaka amin’ny orona ary maharitra mihoatra ny 20 minitra ;
-Manao tevidoha matetika be ;
-Mahatsiaro tena malemilemy na fanimpanina ;
-Misy soritr’aretina mampanahy hafa tsikaritra miaraka amin’ilay tevidoha.