« Cerclage du col de l’utérus » : ireo tsara fantatra mikasik’izany
Maro ireo karazana fandraisan-tanana azo atao eo amin’ny bevohoka izay manao « grossesse à risque » ka anisan’izany ny « cerclage du col de l’utérus ». Teknika iray hisorohana ny fahafahan-jaza na ny fiterehana tsy tonga volana moa izy io. Fa inona tokoa ary ny « cerclage du col de l’utérus » ? ‘Ndeha ho resahana eto ireo tsara fantatra mikasik’izany.
Inona no atao hoe « cerclage du col de l’utérus » ?
Ny « cerclage du col de l’utérus » dia ny fanerena ny vozon’ny tranon-jaza mandritra ny fitondrana vohoka raha atahorana afa-jaza tara loatra na ho teraka tsy tonga volana ny bevohoka. Ny tanjon’izy ity dia ny mba hitazomana ny vozon’ny tranon-jaza hikatona mandra pahatongan’ny fotoana tokony hiterahana (DPA). « Fil » na « bandelette » moa no ampiasain’ny mpitsabo hanaovana ity fanerena ny vozon’ny tranon-jaza ity. Tsy voatery atao eo amin’ny bevohoka manao « grossesse à risque » rehetra moa izy io fa mbola mila mijery lafin-javatra maro ny mpitsabo vao afaka manatanteraka izany.
Ireo antony mety hanaovana « cerclage du col de l’utérus » ny bevohoka
Mety mila atao « cerclage du col de l’utérus » ny bevohoka iray raha toa ka :
-Manao « insuffisance cervicale », izany hoe misokatra aloha loatra mandritra ny fitondrana vohoka ny vozon’ny tranon-jaza ka hahatonga fahafahan-jaza tara loatra na koa hoe teraka tsy tonga volana ;
-Efa teraka tsy tonga volana taloha. Manampy hisorohana izany tranga izany tsy hiverina ny fanaovana « cerclage du col de l’utérus » ;
-Fohy ny vozon’ny tranon-jaza. Mety hampitombo ny « risque » hahatonga fiterahana tsy tonga volana ny fahafohezan’ny vozon’ny tranon-jaza.
Ny fizotran’ny « cerclage du col de l’utérus »
Amin’ny ankapobeny dia eo amin’ny herinandro faha 12 hatramin’ny faha 14 ny vohoka no atao ny « cerclage du col de l’utérus ». Misy fomba roa samy hafa ny fanaovana azy :
-« Cerclage transvaginal », izany hoe avy any amin’ny fivaviana no hametahana ilay « fil » hanerena ny vozon’ny tranon-jaza.
-« Cerclage abdomina », didiana kely eo amin’ny kibo ka avy eo no hametahana ilay « fil » manery ny vozon’ny tranon-jaza.
Atao « anesthésie régionale » na « anesthésie générale » ny bevohoka rehefa manao azy ity ary mila mijanona kely any amin’ny hopitaly mandritra ny fotoana vitsy.
Rehefa vita ny « cerclage » dia mety hahatsapa « crampes » ary handeha rà kely ilay bevohoka. Mila arahana tsara ny tolo-kevitry ny mpitsabo ka anisan’izany ny fakana aina tsara, tsy mampiasa vatana na manao reraka, manao « contrôles » ara-dalàna…
Mila esorina eo amin’ny herinandro faha 36 na faha 37 ny vohoka ny « cerclage », izany hoe alohan’ny fotoana hiterahana (DPA).
