Volon’ny zaza : ireo zavatra tsara fantatra

Inona no mahatonga zaza ho zara raha misy volo ?

Tsy voafaritra mazava hoe oviana no manomboka maniry ny volon’ny zaza. Misy ny zazakely vao teraka sasany efa matevina sy efa misy olioly. Misy kosa nefa ireo izay toa tsy mety maniry mihintsy ny volony fa toa sady fohy no manify kely. Miankina betsaka amin’ny endriky ny « follicules », izay mamokatra ny volo ao ambanin’ny hodi-doha, avy amin’ny fototarazo ny fanirin’ny volon’ny zaza. Arak’izany dia misy ireo « follicules » sasany somary maharitra kokoa vao miasa amin’ny famokarana ny volo eo amin’ny zaza.

Ahoana ny fomba hanapahana ny volon’ny zaza ?

Maro tokoa ireo honohono samihafa mikasika ny fanapahana ny volon’ny zaza. Raha ny fomban-drazantsika Malagasy moa dia misy mihintsy ny fombafomba atao rehefa manao ny « ala-volon-jaza ». Samy manana ny fombany moa ny firenena tsirairay ary samy manaja izany isika. Raha ny lafiny ara-tsiantifika no resahana dia tsy dia misy zavatra tokony ahiana ny mikasika ny fanapahana ny volon’ny zaza. Tandremana fotsiny mba efa ho mahazaka loha tsara ny zaza ary tsy atahorana hihetsika be tampoka no tapahana ny volony, izany hoe rehefa 6 volana no mihoatra, mba tsy handratra azy.

Inona no mahatonga ny zaza hisintona na hanongotra ny volony ?

Misy fotoana mety hisintona na handritrotra tampoka ny volony ny zaza. Indraindray moa dia mety hongotany mihintsy ny volony. Matetika moa zavatra mandalo ary tsy dia misy ahiana loatra ny fanaovany izany. Mety ihany koa nefa ho fambarana adin-tsaina, fahasarotam-piaro amin’ny iray tampo, tebiteby… izay mampijaly saina ny zaza izany ka ny fisintonana ny volony ny fomba hamoahany izany fihetseham-pony izany. Raha toa ka miverimberina io fihetsiky ny zaza io dia mila resahana ny « pédiatre » izany. Ity farany no manoro ny mpitsabo manokana tsara hitondrana ny zaza hahazony ny fandraisan-tanana sahaza.