Aretin'andoha mandritra ny fitondrana vohoka : ireo tsara fantatra
Maro tokoa ireo fiovana eo amin’ny vatana ny vehivavy mandritra ny fitondrana vohoka. Maro amin’izy ireny no miteraka fanelingelenana sy tsy fahazoana aina amin’ny andavanandro ka anisan’izany ny aretin'andoha. Fa inona tokoa no mahatonga ny bevohoka harary an-doha ? Ahoana no fomba atao hampisinda izany ?
Ireo antony mety mahatonga ny aretin'andoha mandritra ny fitondrana vohoka
Misy karazany maro ny aretina an-doha ka ny « migraine » mahazo ny vehivavy mitondra vohoka no resahantsika eto. Mitranga tsikelikely na « par crises » moa ity aretin'andoha mahazo ny bevohoka ity. Miseho amin’ny fanaintainana toy ny hoe mitempotempo ao amin’ny loha na manaikitra mafy amin’ny loha iray manontolo izy io. Matetika izany dia miaraka amin’ny fahatsapana maloiloy na koa tsy fahazakana tabataba na hazavana.
Maro ireo anton-javatra mety mahatonga ny aretin'andoha mandritra ny fitondrana vohoka. Anisan’ireo antony lehibe amin’izany ny tsy fahampiana torimaso. Rehefa tonga amin’ny telo volana farany ny vohoka dia lasa tsy mahita tory firy ny bevohoka ka izay no mankarary ny lohany mandritra ny tontolo andro. Ny antony iray faharoa mety mahatonga io aretina'andoha io ny fiakaran’ny tosidrà mandritra ny vohoka, indrindra raha misy fahasarotana izany. Rehefa misy tosika mafy be anatin’ny lalandrà dia lasa misy « sécrétions » tsy ara-dalàna miforona mampikaikona ny lalandrà ao amin’ny loha izay mitarika ny aretina an-doha.
Ahoana ny atao hampisinda io aretin'andoha eo amin’ny bevohoka io ?
Matetika moa dia ny tsy fahampiana na ny fikorontanan’ny torimaso mandritra ny fitondrana vohoka no mankarary an-doha ny bevohoka. Mba hampisinda izany dia mila hatsaraina arak’izay azo atao ny torimaso. Anisan’ny torohevitra manampy mba hampatory tsara rehefa bevohoka ny fanetsiketsehana tsara ny vatana mandritra ny tontolo andro. Mora mahita tory kokoa rehefa nampiasaina tsara ny vatana. Atao maivamaivana ny sakafo hariva ary miandry ora 1 vao misakafo. Tsy misotro rano be intsony ihany koa aorian’ny 6 ora sy sasany hariva mba tsy ho te hipipy amin’ny alina.
Raha sady marary an-doha ny bevohoka no lasa matavy, misy mivonto ny tanana sy tarehy, manjavozavona ny maso na koa misy manenoneno ao amin’ny sofina dia mila manantona mpitsabo. Ity farany no manao ny fizahana ahafantarana ny olana mety mahatonga ny aretina an-doha sy manao ny fitsaboana mifanaraka amin’izany.
