Aretin-damosina aorian’ny fiterahana : ireo tsara fantatra

Ireo antony mahatonga ny aretin-damosina aorian’ny fiterahana

Maro ireo anton-javatra mety mahatonga ny vehivavy ho tratran'ny aretin-damosina aorian’ny fiterahana. Anisan’ireo antony mateti-pitranga ny :
-Fiovan’ny hormonina. Mandritra ny fitondrana vohoka dia mamokatra hormonina manalefaka ny « ligaments » ny vatan’ny bevohoka hiomanana amin’ny fiterahana. Mety mbola mitoetra io fanalefahana rehefa avy teraka ny vehivavy ka mahatonga ny vanintaolana harefo ;
-Fitomboana lanja. Ny lanja azon’ny vatana mandritra ny fitondrana vohoka dia mety hivesatra amin’ny hazon-damosina sy ireo hozatra ao amin’ny lamosina ;
-« Mauvaises postures ». Ireo fihetsika miverimberina atao rehefa mikarakara sy mitaiza ny zaza, toy ny fitrotroana, fibatana, fampinonoana, fanoloana lamba… dia mety mampirirotra ny hozatra sy ny taolana ao amin’ny lamosina ary hampisy fanaintainana rehefa tsy araka ny tokony ho izy ny paozin’ny vatana (postures) manatanteraka izany ;
-Tsy fahampiana fanetsiketseham-batana. Rehefa tsy ampy ny fanetsiketseham-batana na ny fanatanjahantena aorian’ny fiterahana dia lasa mihamalemy ny hozatry ny lamosina ka handrisika ny fanaintanana eo amin’ity farany.

Ireo vahaolana hampitoniana sy hisorohana izany

Mba hisorohana sy hampitoniana ny aretin-damosina aorian’ny fiterahana dia misy ireo torohevitra sy vahaolana azo aroso hoan’ireo reny :
-Amboarina tsara ny « postures » rehefa mikarakara ny zaza. Mianatra sy mikaroka ny « postures » tokony atao rehefa mibata, mitrotro sy mampinono ny zaza mba hampihena ny firirotra sy ny vesatra ao amin’ny lamosina ;
-Mampihetsiketsika vatana matetika. Tsy voatery hanao fanatanjahantena mandany hery be fa afaka fanazarana malefaka toy ny Pilates, dia tongotra… no atao mba hanamafisana ny hozatry ny lamosina sy hanatsarana ny « posture » ;
-Mampiasa « porte-bébé » mampahazo aina sy tsara kalitao. Ity fitaovana ity dia manampy amin’ny fanaparitahana ny lanjan’ny zaza rehefa mitrotro azy. Izany hoe mba tsy hivesatra be eo amin’ny lamosina sy ny sandry fotsiny ihany ;
-Maka fotoana hakana aina. Tena ilain’ny reny, indrindra ny tera-bao, ny maka aina mba hisorohana ny aretin-damosina aorian’ny fiterahana. Rehefa tsapa fa vizaka loatra na manaintaina ny lamosina dia ajanona aloha ireo raharaha na maka olona hanampy amin’ny fanaovana izany.