Vehivavy tsy te hiteraka : safidy sa fitiavan-tena ?
Nofinofin'ny vehivavy rehetra ny hanan-tokantrano sy hanan-taranaka. Misy kosa nefa ireo miroso amin'ny fanambadiana ihany, nefa misafidy ny tsy hiteraka mihitsy. Inona àry no mety ho anton'izany ary inona no tokony atao ?
Fanapahan-kevitra noho ny antony samihafa
Tsy tongatonga hoazy ny safidy ny tsy hiteraka mihitsy. Matetika dia misy "traumatisme" tamin'ny lasa, izay mifandraika amin'ny fiterahana.
-Famoizana reny na havana akaiky : Misy ohatra ireo vehivavy namoy ny reniny na ny havany akaiky noho ny fiterahana. Mety matahotra ny ainy araka izany ilay vehivavy ka tsy te hierika fiterahana mihitsy.
-Fahazazana tsizarizary : Azo heverina ho mampihemotra amin'ny fiterahana ihany koa ny fijaliana ara-pitiavana na ara-bola nandritra ny fahazazana.
-Fahasalamana tsy tomombana : Mety ho avy amin'ny toe-batana marefo no mahatonga ny vehivavy sasany tsy te hiteraka mihitsy. Mora marary ohatra ilay olona ka mihevitra ny tenany ho tsy hahavita hitondra sy hamelona zanaka mihitsy.
-Tahotra : Misy indray ireo matahotra tsotr'izao ny hitaiza, indrindra raha tsy nisy zazakely na ankizy firy ao amin'ny fianakaviana.
Fanapahan-kevitra mety hiova ihany
Amin'ny ankapobeny, mametraka fepetra amin'izay ho vadiny ny vehivavy tsy te hiteraka mialoha ny fanambadiana. Izy ihany no mikarakara ny vatany mba tsy hampipetraka zaza na dia manao firaisana ara-nofo hatrany aza. Mety hisy ihany nefa ny "declic" ka hampiova ny fanapahan-keviny. Mety mahafinaritra ohatra ny mahita zaza be tsikitsiky sady mahafatifaty any anaty fitaterana iombonana ka haka risika hiteraka ihany. Tsy azo faritana araka izany ilay fiovan-kevitra. Fadiana ny mandresy lahatra loatra na manery ireny vehivavy manana fanapahan-kevitra miavaka ireny, satria mety ho tsapany ihany izay tokony ahitsy rehefa mandeha eny ny fotoana. Matetika dia mitombo ara-boajanahary ny faniriana ho reny rehefa maherin'ny 28 taona ny vehivavy.
