Ankizy misy fofon-kelika : afaka mampiasa déodorant ve izy ireo ?
Mety tsemboka toy ny olon-dehibe ny ankizy. Amin’ny ankapobeny dia mbola tsy misy fofona ny hatsembohan’izy ireny. Rehefa tonga amin’ny taonan'ny miala sakana kosa izy ireo dia manomboka misy fofon-kely. Ny fanontaniana eto dia hoe : afaka mampiasa déodorant ve ny ankizy misy fofon-kelika ?
Manomboka firy taona ny ankizy no misy fofon-kelika ?
Araka ny voalaza teo ambony dia mbola tsy misy fofona ny hatsembohan’ny ankizy. Mbola tsy matoy sy miasa tanteraka tokoa mantsy ny « glandes sudoripares apocrines », izay mahatonga ny fofon-katsembohana eo amin’ny olon-dehibe, eo amin’izy ireo. Rehefa ao anatin’ny fotoana fialana sakana no tena mivoatra ireo « glandes sudoripares » ireo, izany hoe manodidina ny faha 9 sy 13 taona. Amin’izay fotoana izay dia lasa mamokatra hatsembohana misy « lipides » sy « protéines » ny vatan’ny ankizy ka rehefa potehin’ireo bakteria amin’ny hoditra izy ireo dia mamoaka fofona ratsy, toy ny fofon-kelika. Mba hanoherana io fofon-katsembohana io dia maro ireo ray aman-dreny mampanao déodorant ny zanany.
Afaka mampiasa déodorant ny ankizy misy fofon-kelika
Azo atao tsara ny mampanao déodorant ny ankizy misy fofon-kelika. Manampy amin’ny fiadiana amin’io fofon-katsembohana io moa ny fampiasana izany. Marihana kosa nefa fa tsy ny déodorant rehetra no mety amin’ny ankizy. Raha tsy mahazaka ny akora ao anatin’ny déodorant ampiasaina tokoa mantsy ny hodiny dia mety hiteraka vokadratsy toy ny hidihidy, ratra, allergies… Anisan’ireo karazana déodorant fampiasan’ny olon-dehibe tsy mety amin’ny ankizy ohatra ireo vokatra misy akora mahery, toy ny alikaola, sels d’aluminium, huiles essentielles na koa ireo atao hoe « perturbateurs endocriniens ».
Inona ary ny karazana déodorant mety amin’ny ankizy
Efa misy ankehitriny ireo déodorants namboarina manokana hoan’ny ankizy. Izany hoe tsy mitahiry singa na akora mahery tsy zakan’ny hoditr’izy ireo ka azony ampiasaina tsara amin’ny andavanandro. Ilaina ihany koa ny misafidy ny endriky ny déodorant mety amin’ny ankizy toy ireny « roll-on » na « stick » ireny. Izany hoe déodorant ahositra fa tsy atsifitra. Tsara hatrany moa ny manandrana ny vokatra vao tena mampiasa azy io sao sanatria tsy zakan’ny hoditry ny ankizy ka hisy vokadratsiny. Tsy adinoina ny mampatsiaro ny ankizy hoe tsy maintsy sasana tsara sy atao maina tsara ny helika vao mampiasa déodorant !
