Trano tsy azon'andro : Tsy mety amin'ny zazakely
Misy fiantraikany amin'ny fahasalaman'ny zaza ny toerana honenana. Mba hisorohana ny aretina isan-karazany, indrindra mba hiarovana ny havokavoky ny zazakely, tsara raha trano azon'andro tsara no hipetrahana.
Tsy vitsy ireo ray aman-dreny mitaraina noho ny zaza marary lava : tsy mety afa-kohaka, semposempotra, malain-komana. Ny aretin'ny taovam-pisefoana no tena mpiseho. Na misy tokoa aza ny fitsaboana azo atao, miverina marary foana ilay zaza, ary mety hihombo ny aretiny, raha tsy lavorary ny tontolo iainany isan'andro.
Trano tarafin'ny masoandro
Manazava ny trano, manavao ny rivotra sady manala ny mandomando rehetra ny masoandro. Tsy zakan'ny zazakely mantsy ny hamandoana sy ny rivotra maloto. Rehefa manokatra varavarankely izany dia tokony mahatazana masoandro, fa tsy rindrin-trano. Matetika dia manontany hatrany ny mikasika ny trano honenana ny dokotera rehefa mitsabo zaza tsy mety ada-delo na semposempotra.
Tena ilain'ny zaza ihany koa ny mifoka rivotra madio. Azo atao tsara ohatra ny mitondra azy mitsangatsangana eny amoron-drano rehefa faran'ny herinandro iny. Tena mahasoa ihany koa ny rivo-dranomasina raha manana fahafahana.
Trano madio
Mamparary zaza ihany koa ny loto, indrindra ny vovoka. Na dia eo aza ny fahasahiranana noho ny fikarakarana ny zaza sy ny fanenjehana ny asa aman-draharaha, tokony manokana fotoana hanadiovana ny trano sy ny fanaka ao an-trano isan'andro. Diovina avokoa ireo efitra rehetra, satria tsy voatery hijanona ao amin'ny efitrano fandriana foana ny zaza. Sokirina tsara ny vovoka misitrika any ambanin'ireo fanaka isan-karazany. Tsara ihany koa atapy amin'ny masoandro ny bodofotsy, ny serviettes sy ireo karazan-damba eny amin'ireo seza matetika fampiasa. Amporisihana ihany koa ny fanoloana ny lamam-pandriana na lamban-kidoron-jaza in-telo isan-kerinandro farafahakeliny.
Mila madio sy milamina hatrany ny ao an-tokantrano na tsy mora aza ny mitaiza. Iaraha-mahalala fa sarotra ny mitsabo zaza marary.
