Sakafo malagasy : fomba fanaovana romazava matsiro
Isan’ireo sakafo malagasy malaza sy be mpankafy ny romazava. Samy manana ny fomba fikarakarana azy io moa ny tsirairay, misy ireo misafidy azy atao matsatsotsatso ary misy kosa ireo mankafy azy matsiro.
Ireo akora ilaina raha hanao romazava matsiro
-Hen’omby 1 kg ;
-Anana mifangaro 500g ;
-Voatabia 2 ;
-Tongolo 1 ;
-Tongolo gasy hasiny 3 ;
-Sakamalaho ;
-Menaka 2 sotro fihinanana ;
-Sira sy dipoavatra ;
-Rano.
Ireo dingana amin’ny fikarakarana azy
-Tetehana sy sasana ny hen’omby. Afanaina anaty vilany lehibe ny menaka. Rehefa mafana dia arotsaka ao ny hen’omby ary endandasina hahazo lokony ny lafiny rehetra.
-Rehefa mahazo loko ny hena dia esorina tao anaty vilany. Endasina ao anatin’ny vilany nampiasaina teo ny tongolo voatetika mandrapahatonga azy tsy miloko. Alefa ao manarak’izay ny tongolo gasy voatoto sy ny sakamalaho voakiky. Aroharoana mandritra ny 1 minitra.
-Arotsaka manarak’izay ny voatabia voatetika sy ny hen’omby. Asiana sira sy dipoavatra. Aroharoana hifangaro tsara daholo. Asiana rano mandrakotra ny hena ary avela hiketrika eo ambony afo malefaka mandritra ny adiny 1 ora sy sasany na 2 ora. Afaka ampiana rano raha mbola tsy malemy ny hena.
-Mandritra izay fotoana izay dia sasana tsara ny anana ary tetehana tsy atao madinika. Arotsaka ao anatin’ny vilany 30 minitra alohan’ny hamasahan’ilay hena ny anana voatetika. Aroharoana ary avela hiketrika indray. Andramana kely ny sira ka raha tsy ampy dia ampiana kely.
Fanamarihana
Mba hampatsiro tsara ity nahandro ity dia hen’omby somary matavitavy no safidiana. Raha azo atao dia ampiana trafon-kena kely mihitsy. Raha te hahazo tsiro masiatsiaka kely, azo asiana anamalaho ireo anana mifangaro.
