Mandravasarotra : Zava-maniry fanamboarana fanafody natoraly sy "huiles essentielles"
Anisan'ny zava-maniry arovana sady mampiavaka an'i Madagasikara ny "Cinnamosma fragrans" na Mandravasarotra. Marobe ireo mpikaroka, na eto an-toerana na any ivelany, no mampiasa azy hanamboarana vokatra natoraly fitsaboana isan-karazany.
Ny Mandravasarotra na Saro dia zava-maniry be vokatsoa mahasalama, na ilay antsoina hoe "plante médicinale à vertus thérapeutiques". Efa an-taonany maro izy io no ampiasaina hitsaboana sy hampitoniana aretina maro. Fahagola, ireo olona rera-dava toa tsy mety salama, ireo marary vavony sy ireo marary vanin-taolana no tena nitanehana fanafody azo avy amin'ny Mandravasarotra. Voalaza ihany koa fa nahasoa renim-pianakaviana maro io vokatra natoraly io, indrindra ireo vehivavy mitady zaza.
Ireo vokatsoan'ny Mandravasarotra
Ara-bakiteny, manalavitra ny olona amin'ny sarotra ny Mandravasarotra. Manaporofo ny fahafahany manasoa ny vatan'olombelona ireo fikarohana maro nataon'ireo manam-pahaizana.
-Ny tena asan'io zava-maniry io voalohany dia ny mampitombo ny hery fiarovan'ny vatana. Manohitra ireo mikraoba rehetra mety mankarary izany izy. Mampitony ny sery, gripa, aretin-tenda tokoa ny Mandravasarotra. Azo ampiasaina ihany koa izy amin'ny fitsaboana ny aretin-kibo.
-Mandaitra amin'ny fampitoniana ny aretin'andoha sy ny rarintsaina ihany koa ny Mandravasarotra.Mampahita tory sy mahatsara torimaso ihany koa izy raha raisina amin'ny hariva.
-Manadio ny taova any anaty ny Mandravasarotra, indrindra ny aty, ny voa, ny tranon-jaza ary ny vavony.
-Manala ireo poizina entin'ny sakafo tsy mahasoa amin'ny vatana ihany koa io zava-maniry io, toy ny menaka ratsy sy ny siramamy be loatra.
Ny fandraisana ny Mandravasarotra
Raha mahita Mandravasarotra maniry, azo alaina tsara ny raviny. Amainina avy eo izany ravina izany ka anamboarana dite. Alaina ny raviny maromaro ka atao mivadika mena tsara ny rano mangotraka vao esorina eo ambony afo. Iray vera maraina, atoandro, hariva dia efa ampy.
-Azo ilomana ny Mandravasarotra raha rera-dava, marary vanin-taolana na valahana. Ampangotrahina ny raviny sy ny tahony ;
-Raha voan'ny sery na gripa, azo atao evoka ihany koa io zava-maniry io.
-Tsy vitsy ireo mankafy ny fofony ka manisy "huiles essentielles" amina diffuseur, mba hampamanitra ny trano.
Efa marobe ihany koa ireo vokatra voaodina vita amin'ny Mandravasarotra, mba hanamora ny fihinana sy ny fitehirizana azy : huiles essentielles, tisane, sirop, sns. Efa miparitaka manerantany moa ireo vokatra rehetra. Natokana ho an'ny rehetra ny Mandravasarotra, manomboka eo amin'ny faha-3 taona. Ilaina kosa nefa ny torohevitry ny manampahaizana momba ny fahasalamana raha mikasa hanandrana Mandrasarotra ireo olona nahazoazo taona na vehivavy bevohoka/ mampinono
