Rovan'Ambohidratrimo : Vato misy nono, fangatahana taranaka ho an'ny vehivavy tsy mahazo zaza
Antony goavana hamonjen'ny malagasy maro ireny toerana nitoeran'ny Mpanjaka ireny ny fitadiavana fahasoavana. Ho an'ny eny amin'ny Rovan'Ambohidratrimo, mahasarika vehivavy maro ny "vato misy nono", indrindra moa ho an'ireo tsy niteraka na manana olana amin'ny fahazoana zaza.
Vaton-dRakalamomba
Mampalaza ny Rovan'Ambohimanga ny fisian'ny "vato misy nono". Manintona ireo vehivavy tsy mety mahazo zaza tokoa io vato io, ka misy mihitsy ireo tonga avy lavitra hangata-pitahiana. Ara-tantara dia vato nivavahan'i nenibe Rakalamomba izy io. Mafy loatra mantsy ny fanenjehan'ny havana sy ny fiaraha-monina azy. Nanan-taranaka ihany moa izy taty aoriana, ka io vato io izany no fitsofan-drano izay misedra fahasarotana toa azy.
Misy fombafomba arahina eo amin'ilay vato misy nono, ka ilay vehivavy mitady zaza no manao izany, sady misy tompon'andraikitra mikarakara :
-Mametraka hasina
-Mijoro mahitsy manoloana ilay vato misy nono
-Mihemotra mandingana im-pito
-Tapenana amin'ny lamba ny maso, ka ahodikodina mafy im-pito
-Asaina mandroso ka aroso aloha asaina mitsapatsapa avy eo ny tanany.
Raha mahatsapa nono eo amin'ilay vato izy dia midika izany fa hanan-janaka tsy ho ela. Ny tompon'andraikitra mampanao ireo fihetsika rehetra moa dia mahalala hoe lahy sa vavy ny zaza ho avy, arakaraka ny nono voakasik'ilay vehivavy (nono havia dia lahy, raha havanana dia vavy). Raha miara-voakasika ny nono roa dia hahazo kambana izany.
na nono havanana amin'ilay vato).
Raha sanatria kosa ka tsy mahakasika nono amin'ilay vato mihitsy ilay vehivavy na mivily lalana tanteraka dia fambara loza : mety tsy hanam-bitana ny hiteraka mihitsy. Ireo fanahy ao an-toerana mantsy no manome ny valin-teny. Tsy tapitra eo nefa ny fanantenana fa misy ireo mpitaiza mety afaka manampy ireo vehivavy "tsy misy antenaina" mihitsy. Azo atao tsara ohatra ny manarim-bintana. Marihana nefa fa na eo aza ny fiala-nenina, ireo fanahy ihany no tompo-teny farany. Rehefa fanina iny mantsy ilay vehivavy, ny herin'ny fanahy no mibaiko ny lalany fa tsy ny heriny manokana intsony.
Copyright Image : © Moov. Vaton-dRakalamomba. Ankavian'ny Fasan-dRandriambolamasoando
Vato fitsapana vintana
Misy tendrombohitra kely misy lavaka voajanahary eo afovoany, izay natokana ho an'ireo mpivady te hitera-dahy. Fony bevohoka mantsy hono Rambolamasoandro, vadin'Andrianampoinimerina, dia nivavaka sy nanipy vatokely fito nangataka zazalahy. Nahazo lahy soa aman-tsara izy, dia tsy iza fa ny Mpanjaka Radama I.
Taty aoriana, fitsapan'ny mpivady vintana io vato io, indrindra raha te hitera-dahy. Azo atao tsara ihany koa nefa ny mangataka zanaka vavy na fahasoavana hafa. Maka vatokely fito no sady mieritreritra mafy ilay zavatra antenaina. Na iray aza ny vatokely tafiditra dia ho tanteraka izay ilay fangatahana. Raha tsy misy vato tafiditra kosa, mila manarim-bitana. Raha ny tena tsara, ilay olona mitady fahasoavana ihany no mijoro irery mitsapa vintana, satria mety hisy akony ny vintan'ny hafa izay manatrika.
Marihana fa vato roa mifanakaiky no hita ao ambadiky ny Fasana Fitomiandalana. Samy misy lavaka voajanahary ireo vato ireo ary azo ampiasaina avokoa.
Copyright Image : © Moov - Vato fitsapana vintana. Manandrify ny Fasan-dRatrimo
Fandinihan'ireo mpitaiza eny an-toerana
Koa satria tsy anavahana saranga na foko na fiaviana eny an-toerana, marobe ireo vehivavy tonga, hatramin'ny teratany vahiny aza. "Matetika dia ireo avara-pianarana sy manan-katao no misedra olana amin'ny fahazoana zanaka. Matetika mantsy dia misy adidy goavana ankinin'ny fanahy amin'izy ireny. Misy ihany koa ireo mety nanao zavatra mampalahelo ny fanahy noho ny fanaovana tsinontsinona ny hafa ohatra, indrindra fa zaza na ankizy". Ireo fanahin'ireo Mpanjaka izany no manome tsindrimandry ny mpitaiza ny amin'izay tokony atao amin'ny vehivavy iray izay tsy nety nahatsapa nono tamin'ilay vaton-dRakalamomba. Ankoatra ny fanolorana hasina izany, misy ihany koa ireo fombafomba atao sy ny fiovan-toetra, arakaraka ny zava-misy.
Ao amin'ny Trano Masina eo ambonin'ny fasan-dRatrimo moa no toerana fandraisana ireo olona mila fanampiana manokana. Ankoatra ny resadresaka ifanaovana, misy ny fijerena tonom-bintana, miainga amin'ny fanisan'andro Betsileo.
