Ankazomalaza Ambohimanga : Vohitr'Andrianampoinimerina sy Andriamisara, misy Doany miisa 7

Vao miteny hoe Ankazomalaza dia ny fifamatorana sy ny fihavanana teo amin'ny Mpanjaka Andrianampoinimerina sy ny Mpanjaka Andriamisara Sakalava no mby an-tsaina avy hatrany. Teo amin'io toerana io izany no nampihavanana sy nampiraisana ny foko roa tonta, dia ny Merina sy ny Sakalava. Manamarika io toerana io ny fisian'ny Loharanomasina 7 sy ny Doany 7. Hita eny ihany koa ny Loharanon'ny zazavavindrano antsoina hoe Ravololona sy ny lava-bato nitoeran'ny razamben'ny kalanoro.

Tantaran'Ankazomalaza

Raha ny tantara, nanana fikasana hampiray ireo foko maro teto Madagasikara ny Mpanjaka Andrianampoinimerina, nanjaka tamin'ny 1787 hatramin'ny 1810. Tratrany mora foana ny tanjony tamin'ny ankabeazan'ireo foko tany amin'ny faritany maro, afa-tsy ny foko Sakalava. Tsy nanana eritreritra afa-tsy ny hiady mantsy io foko io tamin'izany fotoana izany. Nandefa miaramila hiady amin'ny fanjakana Merina àry ny Sakalava, ka Andriamisara, sady Mpanjaka no mpitsabo no mpitarika tamin'izany.
Rehefa nihaona nefa i Andrianampoinimerina sy Andriamisara dia nifampiresaka tsara, ka nanaiky hiavana ny foko Sakalava. Nivavaka àry Andrianampoinimerina, ka nitehina tamin'ny vatobe iray : tamin'izany indrindra no nizara roa ilay vatobe ka nivoaka loharano. Izany hoe nisy porofo azo tsapain-tanana mihitsy ilay velirano. Io loharano io moa dia mbola misy mandrak'ankehitriny ka entina hanomezan-tso-drano sy hitsaboana mihitsy.
Nisy ihany koa ny fanaovana fatidrà tamin'izany fotoana nanaovana fampihavanana izany. Samy nanatsatoka ny tehiny avy i Andrianampoinimerina sy Andriamisara ka naniry ireo : izany no nahazoana ny anarana hoe "Ankazomalaza". Efa somary maina ireo hazo ireo, saingy tsy ireo akory no iankohofana. Marika fotsiny ihany ireo fa misy razambe izay mihaino ny vavaka atao ka mampita izany amin'ny Zanahary. Fanahy nefa no resahina, izany hoe Andriamanitra Andriananahary ihany no

Doany 7 sy Loharano 7

Samy miisa 7 na ny Doany na ny Loharano ao Ankazomalaza Ambohimanga. Ny Doanin'Andrianampoinimerina no lehibe indrindra amin'izany. Tsy lavitra io toerana io ny Doanin'Andriamisara. Tsiahivina fa iray ihany aloha no loharanon'ireo doany roa ireo. Mandro sy midio eo amin'io loharano nanaovana velirano io ny olona tonga eny.
Marihana fa ny tsara ihany no azo angatahina ao an-toerana : ho an'ny tena, ho an'ny tokantrano, ho an'ny fianakaviana sy ny namana. Anisan'ny Fady izany no "mibaiko ny fanahin'ireo razambe" hanao ratsy olona.
-Doanin'Andrianampoinimerina
Fady toaka i Andrianampoinimerina, satria "tsy mampahendry ny hendry, sady tsy maha-manam-panahy ny manam-panahy ny toaka" raha ny heviny. Noho izany dia tsy tokony hisotro toaka na hametraka fanatitra toaka ny olona izay misafidy ny hivavaka ao amin'ny doanin'Andrianampoinimerina. Mifanohitra amin'izany nefa ny any amin'ny Doanin'Andriamisara sy ny Doanin-dRakotomaditra. Tena tia toaka mantsy ireo.
-Doanin'Andriamisara
Araka ny efa voalaza, Sakalava i Andriamisara. Fady akoho izy noho izany. Rehefa miditra eo amin'ilay toerana marina dia esorina ny pataloha fa sikina no anaovana. Raha misy fanatitra atao dia apetraka eo ambony hazo.
-Doanin-dRakotomaditra
I Rakotomaditra, miaramila mpiandry vavahadin'Andrianampoinimerina, dia sady tia sigara no tia toaka. Rehefa miditra an'Ankazomalaza dia tsy maintsy mandalo sy mangata-dàlana eo amin-dRakoromaditra vao afaka mitsidika ireo doany sy loharano rehetra.
-Doanin'i Nenibe Ravola
Mbola ao Ankazomalaza ihany no misy ny Doanin'i Nenibe Ravola, izay renin'Andriamisara. Anisan'ny tena tian'izy io ny paraky. Ireo mitady zaza, mitady fanasitranana sy mitady asa no tena manantona ny faritra voatokana ho an'i Nenibe Ravola. Misy ihany koa moa ny tambavy azo vidiana.
-Doanin'Andriantsihoarana sy Andriamanintona
Milevina ao amin'io toerana io i Andriantsihoarana. Efa tsy hita moa ny taolambalony, saingy nisy teratany vahiny nahazo tsindrimandry ka nahita sy nanatitra izany. Ny an'Andriamanintona kosa dia tsangambato ihany no ao.
-Doanin'i Nenibe Ramaroanaka
Eny Ambatondradama no misy azy. Amin'ny maha-Ramaroanaka azy, mpanome fahasoavana manokana ho an'ireo vehivavy mitady zaza io fanahy io. Maro ihany koa ireo vehivavy te hahita vady sy haharitra amin'ny asa no mamonjy izany Doany izany.

Toerana Zazavavindrano

Araka ny efa voalaza etsy ambony, misy loharanona zazavavindrano antsoina hoe Ravololona ny eny Ankazomalaza Ambohimanga. Raha ho any amin'ny Dadibe dia tsy maintsy misaika eo amin'io rano io aloha. Ny tena mpampiasa io rano io moa dia ireo itoeran'ny fanahin'ny Dadibe sy ny Kalanoro. Azon'ireo mangataka fitahiana atao ihany koa nefa ny mampiasa io rano io.
Ny fomba fanao amin'izany moa dia mandrehitra jiro aloha (labozia). Misy ny fanatitra apetraka, dia ny ranomboankazo, ny vatomamy, ny tantely ary ny ranomanitra. Mitsoboka im-pito ao anatin'ilay rano avy eo ilay olona midio.
Manana loharano masina ihany koa ny zazavavindrano zanak'i Ravololona, fantatra amin'ny anarana hoe Lidy kely. Fangalan'ny olona rano atao fiarovana amin'ny ratsy sy fanasitranana io loharano io. Marihana fa tsy azo itondrana toaka eny amin'ireo toerana misy ireo zazavavindrano.

Lavabaton'ny Kalanoro

Amin'ny toerana ambony no misy ny lavabato iray, izay toerana nisy ny razamben'ny Kalanoro antsoina hoe Totozima Tsimandefitra Malazamanana. Azo idirana tsara moa ilay lavabato, ary tsy maizina ny ao satria misy labozia mirehitra matetika. Tonga ao ireo olona mangataka fitahiana sy fahasoavana, sady manasina. Misy sarin'olondroa maromaro ao, satria entin'ireo te hampody ny vadiny izany, na lahy na vavy. Tsy famosaviana moa no atao fa fombafomba sy fangatahana ny amin'ny ilaminan'ny tokantrano indray.
Manana loharano masina ihany koa ity lavabato ity, saingy mbola kilometatra maromaro miala an'Ankazomalaza no misy izany. Tsy azo anasinana io toerana io rehefa alarobia.

Fitsidihana sy fanajana ireo fepetran'Ankazomalaza

Rehefa Alahamady no tena be olona eny Ankazomalaza. Marobe ireo nangataka fitahiana no manao sorona mba ho fisaorana sy fizarana hafaliana. Misy ohatra ny manolotra ombilahy mazavaloha, ka ifampizarana amin'ny mponina manodidina ny hena. Rehefa mamono omby moa dia misy ny fombafomba atao. Tsy ariana moa ny ràn'ilay omby fa angonina anaty daba, ka hanaovana ny fanasinana.
Ireto àry misy toro vitsivitsy ho an'ireo manam-pikasana hitsidika ireo Doany Ankazomalaza Ambohimanga :
-Manala kapa, misikina, tsy manao akanjo mainty ;
-Tongotra havanana no alefa aloha raha hiditra, ary tongotra havia raha hivoaka ;
-Tsy mitondra sady tsy mihinana ondry, osy, kisoa, akoho, dokotra, tongolo .
-Tsy manao fiteny na fitondrantena tsy mendrika.