Fitsaboana : Homen-danja ny vehivavy mandritra ny andro manerantany ho an'ny fahasalamana

Fanomezan-danja ny vehivavy

Ratsy ny antontan’isa nivoaka farany momba ny fahasalaman’ny vehivavy eto Madagasikara. Raha momba ny fahasalamana eo am-piterahana fotsiny, ohatra, dia nambaran’ny filan-kevitra nasionalin’ny vehivavy (Conseil National des Femmes) fa mbola ambony ny taham-pahafatesan’ny reny eo am-piterahana. Ny taona 2024 dia miisa 408 ny maty amin’ny olona velona miisa 100.000 manerana ny Nosy. Miisa 426 amin’ny 100 000 izany any ambanivohitra, ary 312 amin’ny 100 000 ny eny an-tanàn-dehibe. Ireo karazana tsy fandraisana an-tanana sy faharatsian’izany no isan’ny antony mahatonga ireo fahafatesana ireo. Izany indrindra no anton’ity lohahevitra ity, mba hanalefahana sy hialana amin’izany loza izany.
Marihina fa tsy io fahasalamana mandritra ny fiterahana io irery no mitondra faisana toy izany fa saika ambanin-javatra avokoa ny fitsaboana mikasika ny vehivavy eto Madagasikara. Araka izany, maro ireo hetsika ara-pahasalamana entina hanomezana lanja azy ireo amin’ity fankalazana ity. Isan’ny hisongadina amin’izany ny fisafoana ho an'ny vehivavy bevohoka, eo ihany koa ny fitiliana ny homamiadan'ny vozon'ny tranon-jaza sy ny nono ary fanomezam-bakisiny ho an'ny reny bevohoka sy ny zaza.

Fizaham-pahasalamana samihafa

Ankoatra izay anefa dia fankalazana natao ho an’ny daholo be ihany io fotoana io ka hisy fizaham-pahasalamana maro isan-karazany, mndritra ny fotoana. Ao anatin’izany ny fitiliana maso izay hisy fanomezana solomaso maimaimpoana, fitiliana diabeta, VIH/Sida, tosidrà ary sofina. Eo amin’io kianja filalaovam-baolina io avokoa no hanatanterahana izany.
Tsy hiala ao anatin’ny fotoana ihany koa ireo fanentanana samihafa. Hisongadina ny fanentanana momba ny fampiasana fandrindrana fiainam-pianakaviana. Ankoatra izay ny torohavitra ara-pahasalamana isan-karazany ho an’ireo izay mila izany.