Fahasalamana : Hatomboka amin’ny toerana miisa 4 eto Analamanga hatrany Boeny ny « caravane médicale » amin'ity taona ity

Analamanga hatrany Boeny

Toerana miisa efatra ao anatin’ny faritra telo samihafa no handalovan’ity hetsika ara-pahasalamana maimaimpoana ity. Eny Ambohidratrimo, eo amin’ny Terrain Synthétique, eto anatin’ny faritra Analamanga no hanombohana ny hetsika, rahampitso, 26 febroary. Fizaham-pahasalamana momba ny aretina maro samihafa, torohevitra sy fanampiana maro no ho sitrahina mandritra izany. Hitohy any amin’ny faritra Betsiboka, izany hoe ao Maevatanana kosa izany ny 1 marsa ho avy izao. Aorian’izany dia hihazo ny faritra Boeny ireo mpitsabo ary hijanona ao Tsaramandroso ny 4 marsa raha hanohizana azy kosa ny ao Mahajanga ny 7 marsa ho avy izao. Hifarana amin’ny fanamarihana ny andron’ny vehivavy ny hetsika, ny 8 martsa, ao an-drenivohitr’i Mahajanga. Fanomezana tolotra ara-pahasalamana maimaim-poana sy manakaiky vahoaka moa ity « caravane médicale » ity raha tsiahivina.

Fitsaboana maimaim-poana

Fiarabe maro, izay efa misy fitaovam-pitsaboana, no handeha hanatona ny vahoaka sy hanome fitsaboana maimaim-poana nandritra izay andro maromaro izay. Hisy ny fizaham-pahasalamana, ny fitiliana, ny fitsaboana sy ny fandidiana, izay hahasahana trangan’aretina sy tsy fahasalamana isan-karazany. Isan’izany ny aretin’ny nify sy ativava, ny tsy fahampian-tsakafo... Hisy ihany koa ireo karazana tolotra sy fandraisana an-tanana, toy ny fanagatahana torohevitra mikasika ny fanabeazana aizana sy ny fanaovam-baksiny… Raha tsiahivina ireo hetsika efa natao rehetra hatramin’ny taona 2023 dia efa olona an’aliny no nisitraka ity hetsika ara-pahasalamana ity. Manala fahasahiranana rahateo izy satria tsy handoavam-bola.