Banky Foiben'i Madagasikara : Nanao fianianana ny Governora vaovao, Aivo Handriatiana Andrianarivelo
Nanao ny fianianany nanoloana ny Fitsarana Tampony ny Governora vaovaon’ny Banky Foibe, Atoa. Aivo Handriatiana Andrianarivelo, androany 03 Febroary 2023.
Nanatrika izany lanonana ara-pitsarana izany ny Filoham-pirenena Andry Rajoelina, sady filohan’ny Filankevitra Ambony ny Mpitsara.
Niarahaba ity Governora vaovaon’ny Banky Foibe ity ny Filoham-pirenena ary nankahery azy amin'ny adidy aman'andraikitra goavana izay miandry azy. Andraikitry ny Banky Foibe tokoa no miantoka ny fahamarinan-toerana ara-bola sy ny fanamafisana ny rafitra ara-bolan'ny Repoblikan’i Madagasikara. Izy irery ihany no manana fahefana hanonta vola eto amin'ny tanin'ny Repoblika ary mamaritra ny politika fitantanana ny vola eto amin'ny firenena.
Anisan'ny manam-pahaizana manokana amin'ny toekarena, ny "marché des capitaux" , ny fitantanam-bolam-panjakana, ny banky sy ny microfinance moa ny Governora vaovaon’ny Banky Foibe, Atoa. Aivo Handriatiana Andrianarivelo
