Fantatrao ve fa misy fiantraikany eo amin’ny hoditra ny rarintsaina ?

Ahoana no fiantran’ny rarintsaina amin’ny hoditra ?

Rehefa tratran’ny rarintsaina isika dia mamoaka hormonina toy ny « cortisol » ny vatana. Raha be loatra io hormonina io dia manelingelina ny fiasan’ny hoditra amin’ny lafiny maro :
-Mitombo ny famokarana menaka (sébum) : mampitombo ny asan’ny « glandes sébacées » ny rarintsaina ka mety hiteraka mony.
-Mihena ny fiarovan’ny hoditra : lasa mora marefo, maina ary mora voan’ny « irritation » ny hoditra.
-Mampitombo ny fivontosana (inflammation) : mety hiharatsy ny aretin-koditra toy ny « eczéma », « psoriasis » na « rosacée ».
-Miadana ny fahasitranana : ela kokoa vao sitrana ny ratra sy ny mony.
-Mampandeha haingana ny fahanterana : mety hiseho aloha ny ketrona sy ny hoditra malazo.

Ireo soritr’aretina hita maso

Samy hafa ny fisehon’ny rarintsaina eo amin’ny hoditra amin’ny olona tsirairay, saingy ireto no matetika hita :
-Misy mony mipoitra tampoka na mitombo be ny mony raha efa misy,
-Misy mivaramena sy « irritations »,
-Mivaloarika sy malazo ny hoditra,
-Misy « cernes » sy « poches » eo ambany maso,
-Fahatsapana ho makiana na mangidihidy eo amin’ny hoditra.
Indraindray dia vao mainka mampitombo rarintsaina ireo soritr’aretina ireo, ka lasa « cercle vicieux ».

Ahoana no hiarovana ny hoditra amin’ny rarintsaina ?

Mba hiarovana ny hoditra amin’ny vokadratsin’ny rarintsaina dia misy ireo fomba tsotra afaka manampy :
-Manaraka « routine de soin » na fikarakarana hoditra sahaza
Diovina amin’ny fomba malefaka ny hoditra, asiana « crème » mampihena ny fahamainana isan’andro. Vokatra mifanaraka amin’ny karazan-koditry ny tena ny vokatra ampiasaina. Ny vokatra mampitony sy misy « antioxydants » no isany tena ilaina.
-Mifehy ny rarintsaina
Ny fikarakarana ny hoditra dia tsy misaraka amin’ny fikarakarana ny saina. Azo atao ny manandrana « méditation », « yoga », na fanazaran-tena amin’ny fifohana rivotra lalina mba hifehezana ny rarintsaina.
-Matory ampy
Zava-dehibe amin’ny fanavaozana ny sela ny torimaso. Ny tsy fahampian-torimaso dia mampitombo ny soritr’aretin’ny havizanana sy ny fahanterana, indrindra eo anivon’ny hoditra.
-Mihinana sakafo voalanjalanja
Ilaina ny mihinana sakafo manankarena vitamina, mineraly ary « antioxydants » (voankazo, legioma, voanjo, trondro matavy) mba hitazomana ny fahasalamana sy ny fahatanoran’ny hoditra. Fadiana ny siramamy be loatra sy ny sakafo voahodina.
-Manao fanatanjahantena
Manampy amin’ny fampihenana rarintsaina ny fanatanjahantena ary manatsara ny fivezivezen’ny rà, ka mahatonga ny hoditra ho mamirapiratra kokoa.