Fahalotoan’ny rivotra iainana: loza mitatao ho an’ny fahasalamana
Miazakazaka ny fivoaran’ireo tanan-dehibe eto Madagasikara, toa an’Antananarivo, Toamasina, Mahajanga… Na dia eo aza ny fandrosoana entin’izany dia misy ihany koa ny olana aterany, indrindra ny fahalotoan’ny rivotra. Vokatry ny fitohanan’ny fiara, ny fampiasana angovo nentim-paharazana, ary ny tsy fahampian’ny fitantanana fako, dia mihena tsikelikely ny kalitaon’ny rivotra iainan’ny mponina.
Loharanon’ny fahalotoan’ny rivotra an-tanan-dehibe
Maro ireo antony mahatonga ny fahalotoan’ny rivotra amin’ireo tanan-dehibe eto Madagasikara. Anisan’ny lehibe indrindra ny fifamoivoizana: fiara efa antitra, solika tsy dia manara-penitra, ary ny fitohanan’ny lalana isan’andro izay mampitombo ny setroka sy ny entona manimba ny fahasalamana.
Ankoatra izany, mbola betsaka ny tokantrano mampiasa saribao sy kitay handrahoana sakafo. Ireo setroka mivoaka amin’izany, indrindra rehefa tsy misy rivotra mifamezivezy tsara ao an-trano, dia mety hankarary. Eo ihany koa ny fandoroana fako eny rehetra eny, izay mamoaka entona sy setroka misy poizina.
Fiantraikany amin’ny fahasalamana
Ny fifohana rivotra maloto maharitra dia miteraka olana maro amin’ny fahasalamana. Eto Madagasikara, isan’ny aretina fahita matetika ety an-tanàn-dehibe ny aretin’ny taovam-pisefoana. Marefo kokoa amin’izany ny ankizy, ny zokiolona ary ny olona efa manana aretina mitaiza.
Ny poti-javatra madinika ao anaty rivotra dia miditra lalina any anaty havokavoka ka mety hiteraka na hanamafy aretina toy ny sohika, ny « bronchite », ary ny aretin’ny havokavoka hafa. Misy fiantraikany amin’ny fo sy ny lalan-drà ihany koa izany, ary mety hitarika homamiadana amin’ny fotoana maharitra.
Amin’ny ankizy, mety hanelingelina ny fivoaran’ny havokavoka ny loto amin’ny rivotra. Amin’ny vehivavy, indrindra ireo miaina amin’ny setroka avy amin’ny fatana, dia mety hisy vokany amin’ny fitondrana vohoka.
Ny olan’ny fako miangona an-tanàn-dehibe
Olana iray lehibe ihany koa ny fako miangona. Mbola tsy ampy na tsy mahomby ny fanangonana fako ka miteraka fitangoronana eny an-dalana sy eny amin’ny toeram-ponenana. Ireo fako ireo, rehefa lo na dorana, dia mamoaka fofona maimbo sy entona manimba ny rivotra. Ankoatra izay, mety hiteraka aretina hafa koa izy ireny satria manintona bibikely sy voalavo. Noho izany, tsy vitan’ny manimba ny tontolo iainana ihany ny fako, fa manampy trotraka ny fahalotoan’ny rivotra sy ny loza mitatao amin’ny fahasalamam-bahoaka.
Vahaolana azo raisina
Mba hanatsarana ny kalitaon’ny rivotra dia ilaina ny fandraisana andraikitra maromaro:
-Fanavaozana ny fiara sy fanatsarana ny fitateram-bahoaka,
-Famporisihana ny fampiasana angovo hafa solon’ny saribao sy kitay,
-Fanatsarana ny rafitra fanangonana sy fitantanana fako,
-Fanentanana ny mponina amin’ny fiarovana ny tontolo iainana,
-Fametrahana rafitra mandrefy sy manara-maso ny kalitaon’ny rivotra.
