Taom-baovao malagasy : Nampahafantarina ireo mpianatra ny mikasika ny fankalazana sy ny fomba

Hampitaina ny soatoavina sy ny kolontsaina

« Rariny sy hitsiny raha hampahafantarina ny tanora ny fomba satria fanilo mampita ny soatoavina sy ny kolontsaina malagasy ho an’ny taranaka izy ireo », hoy ny Printesy Ratsimamanga Ralandison Fenosoa, mpikambana ao amin’ny vaomieran’ny fikarakarana ny taom-baovao Malagasy. Ireo mpianatra avy amin’ny Lycée Technique Commercial Ampefiloha, izany hoe manomboka eo amin’ny 14 taona eo ho ireo nampahafantarina ny fomba ireo.
Nampahafantarina azy ireo tamin’ny antsipirihany ny mikasika ny taom-baovao Malagasy. Nanomboka tamin’ny tantaran’izany fomba izany, ireo karazana taom-baovao Malagasy roa ankalazaina eto Madagasikara hatramin’ny fomba fomba fanao rehefa amin’izany fotoana izany. « Tsara hampitaina izany rehetra izany mba hananan’ireo tanora ireo fahalalana miavaka momba ny taom-baovao malagasy ka tsy hahafaty ny fankalazana izany any aoriana any », hoy hatrany ny fanazavana. Natao indrindra araka izany, ity fotoana ity hampiroboroboana ny fomba malagasy eo amin’ny tanora.

Fampiraisana ny Malagasy

Samy manana ny fombany ny Malagasy, indrindra ireo foko 18 izay misy. Izay fomba samihafa izay indrindra no nampiraisana ny fankalazana mba tsy hisian’ny fahasamihafana. Samy afaka mankalaza io fomba io avokoa mantsy ny isam-paritra sy ny isam-poko. Amin’ny fomba ofisialy kosa dia indroa miantaona ny fankalazana. Ity hotanterahina ny faran’ny herinandro izao ity ny « taom-baovao malagasy fidiovana ». Any ho any amin’ny volana septambra any kosa no hankalazana ny « taom-baovao lohataona ». Miovaova araka ny fijerena ny fandehan’ny volana eny amin’ny lanitra kosa no hamaritana ny daty.
Fanirian’ireo mpikarakara kosa dia mba ho fankalazana hisy fanantenana vaovao ho an’ny Malagasy izy io.