Orambe teto amin’ny Faritra Analamanga : Olona 3 no namoy ny ainy, 9 761 isa no traboina
Niaina tao anaty orambe indray ny Distrika sy Kaominina maro teto Andrenivohitra, nanomboka ny sabotsy 22 martsa 2025. Nitarika fiakaran’ny rano izany, raha tsy hilaza afa-tsy ny reniranon’i Sisaony, fa nitarika hatrany amin’ny famoizana aina ihany koa.
Orambe nahakasika Distrika 3
Araka ny tatitry ny Birao Nasiônaly misahana ny Tandindon-doza sy ny Loza (BNGRC), tamin’ny datin’ny 24 martsa 2025 tamin’ny 4 ora tolakandro, dia Faritra 1, Distrika 3, ary Kaominina 6 no voakasiky ny orambe nitranga teo anelanelan’ny 22 hatramin’ny 24 martsa 2025. Vokatr’izany dia olona miisa 3 no namoy ny ainy, ka ny 2 tany Ambohijanaka ary ny 1 tany Ampitatafika.
Nisy ihany koa ny olona traboina, izay nahatratra 9.761 olona, na 2.762 tokantrano. Tao amin’ny Distrikan’Antananarivo Atsimondrano no betsaka indrindra tamin’ireo, izay nahatratra 8 310 isa, na 2 338 tokantrano. Nahitana olona traboina ihany koa tamin’ny Boriborintany miisa 3 teto Antananarivo Renivohitra, dia tao amin’ny Boriborintany voalohany, faharoa ary fahefatra. Ny 5.626 isa tamin’ireo olona traboina no nafindra amin’ny toerana fandraisana vonjimaika miisa 8.
Fanorenana tsy ara-dalàna
Etsy an-daniny, goavana ny fahasimban’ny fotodrafitrasa, raha ny fahavakisan’ny fefiloha no resahina. Raha ny teny Ampitatafika dia trano miisa 50 niorina teo ambony fefiloha no nirodana, araka ny atontan’isa avy amin’ny Kaominina Ampitatafika. Fanorenana tsy ara-dalàna avokoa ireo. Araka ny antontanisan’ny BNGRC kosa dia trano 2.223 no dibo-drano teto amin’ny Faritra Analamanga izay voakasiky ny orambe, ary trano miisa 6 no rava tanteraka. Tatitra vonjimaika ihany moa ireo, fa mbola ao anatin’ny fanagonam-baovao tanteraka ny BNGRC.
Raha ny vinavinan’ny toetry ny andro kosa dia mbola hanorana hatrany ho an’ny anio eto Analamanga, araka ny nambaran’ny Foibe Famantarana ny toetry ny andro, fa hihena miandalana izany rotsak’orana izany manomboka ny alarobia.
