Meca Mobile : Fikojana sy fanamboarana fiara amin'ny toerana rehetra

Anisan'ny manahirana ny maro ny mikaroka "mécanicien" matihanina rehefa sendra misy simba ny fiara. Tsy voatery hahatokisana avokoa mantsy ireo mitono-tena ho mahay manamboatra fiara rehetra. Tsy vitsy ireo miovaova olona hatrany, na amin'ny fanamboarana na amin'ny fikolokoloana ny fiara.

Teknisianina mahatoky azo antsoina foana

Ny hanolo-tanana ireo olona sendra fahasimbana fiara no tena antom-pisian'ny Meca Mobile. Miasa 24 ora amin'ny 24 sy 7 Andro amin'ny 7 ireo teknisianina ka mamonjy ireo mila fanampiana. Jerena izay fototry ny olana ka azavaina tsara amin'ilay tompon'ny fiara izay tokony atao. Mazava tsara izany ny vola aloha amin'ny faktiora, sady azo antoka ny fanamboarana atao.
"Mampiasa fitaovana avolenta ireo manampahaizana mijery ny fiara ka tsy misy ahiana ny valin'ny fizahana. Misy ny piesy mety azo amboarina vonjimaika, arakaraka ny zava-misy. Raha mila piesy moa dia efa misy mpamatsy azo antoka miara-miasa. Manantona izahay satria tsara raha tsy ahetsika ny fiara rehefa misy olana mba isorohana ny lozam-pifamoivozana", hoy ny mpitantana ny Meca Mobile, Ifaharana Randriantsarafara.

Matihanina manampy amin'ny fikolokoloana ny fiara

Voatahiry avokoa ny mombamomba ireo fiara kirakirain'ny Meca Mobile. Rehefa misy "entretien" tokony atao dia mahazo fampahatsiahivana ny mpitondra fiara tsirairay. Fomba fiasa entina ikojana tsara ny fiara izany, sady isorohana ny loza mety hitranga. Mba hifampitsinjovana, natao mirary ihany koa ny saran'ny asa rehetra. Ny "diagnostic" ohatra dia manomboka amin'ny 60 000 ariary.
"Ezahina atao takatry ny rehetra ny vola aloha. Misy ihany koa ny fahafahana tsy mandoa ny faktiora eo no ho eo", hoy hatrany ny tompon'andraikitra, Ifaharana Randriantsarafara.