Worldskills : Hampiakarina ny traikefan’ireo malagasy handray anjara sy ny kalitaon’ireo asa tanana

Fanatsarana ny kalitaon’ny vokatra

Ny Talen’ny fanadinam-panjakana ao amin’ny Minisiteran’ny fampianarana teknika sy ny fanofanana arak’asa, Randriantsivery Jean Rémi no nanokatra tamin’ny fomba ofisialy ny fotoana. Nahitana mpandray anjara 28 nandritra izany. Tao ireo mpampiofana, ireo matihanina amin’ny sehatry ny Textile-Habillement et Accessoires (Coupe et couture, Vannerie, Broderie), Ouvrages Bois sy Métalliques, ary ireo tompon’andraikitra eo anivon’ny ministera. Nandritra ny atrikasa dia nifampizara sy nifanakalo hevitra tamin' ny Expert International Worldskills, Andriamatoa Jean Christophe Soubervie, ireo mpandray anjara. Tanjona amin’izany ny fanamafisana ny fahaiza-manaon’ny tanora amin’ny sehatry ny ny lamba, lamaody sy ireo mifanaraka aminy (Textile-Habillement et Accessoires) ao anatin’izany ny zaitra ny tenona, ary ny petakofehy. Teo ihany koa ny momba ny asa amin’ny hazo sy ny vy (ouvrages bois et métalliques). Izany no natao mba hanatsarana hatrany ny kalitaon’ny fanofanana sy fanomanana amin’ny fifaninanana eo amin’ny sehatra rezionaly sy nasionaly.

Fifaninanana iraisam-pirenena

Tanjona iray ihany koa ny mba haha-matihanina ireo tanora handray anjara amin’ny fifaninanana. Tsara ny manamarika fa firenena maro maneran-tany no hifaninana amin’ity Worldskills ity, aorian’ny fifantenana eto an-toerana sy ao anatin’ny faritanin’i Afrika.
Io fifaninanana io dia hahafahan’ny tanora manerana izao tontolo izao mandrefy ny fahaizany amin'ny asa mihoatra ny 60. Sehatra miisa sivy mifandray amin’ny toekarena no hifaninanana ao. Ao anatiny ny tsiro, fivezivezena na fitaterana, fanorenana, fifandraisana sy nomerika, indostria, serivisy sy tolotra samihafa, hotely sy sakafo, zavamaniry ary zavakanto.
Marihina fa any Marseille no hanatanterahana ity fifaninanana iraisam-pirenena ity ny 6 hatramin’ny 18 oktobra 2025.